Балаҕан ыйын 4 күнүгэр Саһылга хаарбах туруктаах дьиэттэн көһөрүү бырагырааматынан тутуллубут уон кыбартыыралаах дьиэ үөрүүлээх аһыллыыта буолла. Бастакы икки мэндиэмэннээх мас дьиэ иэнэ барыта 870-тан тахса квадратнай миэтир. Кыбартыыралар үстүү хостоохтор, балконнаахтар. Олохтоохтор саҥа дьиэлэригэр көһөн эрэллэр.
Бу күн уон ыал кэтэһиилээх күлүүстэрин туттулар. Саҥа дьиэҕэ киирбиттэринэн кинилэри улуус баһылыгын 1-кы солбуйааччыта Константин Сайфутдинов эҕэрдэлээтэ уонна: «Уон кыбартыыралаах дьиэ үлэҕэ киириитинэн Томпо улууһугар 2013-2017 сыллааҕы хаарбах туруктаах дьиэттэн дьону көһөрүү бырагыраамата бүтэр. Кэскилгэ өссө аҕыс дьиэ хаарбах туруктаах, онон биһиги бу бырагыраама саҥа сүһүөҕүнэн салгыы үлэлиэхпит», – диэтэ. Кини улуус салалтатын аатыттан тутууга көхтөөхтүк үлэлэспит дьоҥҥо махтал суруктары уонна грамоталары туттартаата.
Саҥа дьиэлэммиттэр ааттарыттан үлэ бэтэрээнэ Александра Степанова тыл эттэ: «1993 сыллаахха тутуллубут бастакы арбалит дьиэлэртэн бу аныгылыы тутуулаах, улахан, сырдык дьиэҕэ киирэрбититтэн олус дьоллоохпут. Уруккубут бастакы үс эрэ сыл ичигэс этэ, ол кэнниттэн тоҥон араастаан сылыттар этибит. Субподрядчик Александр Свинобоевка махталбыт улахан. Күлүүс ыларбытын үс сыл кэтэстибит, саҥа дьиэбит сылаас буолуо диэн эрэнэбит!»
Эҕэрдэлэргэ саҥа дьиҕэ киирбит «Далбара» ансаамбыл салайааччыта Ольга Охлопкова уонна эдэр ырыаһыттар Анна Уваровская, Виолетта Комиссарова кыттыстылар. Алгыс сиэрин-туомун кэнниттэн нэһилиэк олохтоохторо уонна ыалдьыттар саҥа кыбартыыралары көрдүлэр.
Ааптар: Мария ЖИРКОВА.
