Европа Кубогар кыайыы Рио-де-Жанейроҕа буолар Олимпиадаҕа кыттар кыаҕы биэриэ диэн Олимпийскай эрэллэр училищелларын иитиллэччитэ Розалина Тимофеева эрэнэр. Ити туһунан кини бүгүн суруналыыстарга эттэ. Санатар буоллахха, оҕунан ытыыга Европа Кубога Венгрия Хивз куоратыгар буолан ааспыта.
«Оҕунан ытыы мин төрүттэрим утумнаабыт, сөбүлээбит дьарыктара: эһээм уонна тренерим Анатолий Тимофеев, чугас аймахтарым Кристина уонна Евгения Тимофеевалар. Быйылгы ситиһиибиттэн олус үөрдүм. Билигин Россияҕа бастыыр иһин уонна Европа Кубогын иккис түһүмэҕэр күүс-уох ылыныахтаахпын. Хас биирдии спортсмен курдук, Олимпиадаҕа кыттыы – мин ыра санаам. Билигин буолбатаҕына, кэлэр Олимпиадаҕа кыттар соругу бэйэбэр туруорунабын», —диэтэ Розалина Тимофеева.
Спорт миниистирин солбуйааччы Георгий Балакшин, олимпийскай эрэллэр училищеларын салайааччытын солбуйааччы Леонид Спиридонов, Горнай улууһун баһылыга Никита Андреев эҕэрдэ тылларын тиэртилэр.
«Азия оҕолоро» ааспыт оонньууга боруонса мэтээли ылбытым. Финал буолуор диэри букатын долгуйбатаҕым. Эдэр спортсменнар бэйэлэригэр бигэ эрэллээх буолалларыгар, утарсааччы күүстээҕин туһунан санаабаттарыгар баҕарыам этэ. Тренер этэрин истии, толруу, тулуурдаах, дьулуурдаах буолуу – бу сүрүн ирдэбиллэр» — диир Розалина Тимофеева.
