Ытыктабыллаах Саха сирин олохтоохторо!
Саха Өрөспүүбүлүкэтин Ил Түмэнин аатыттан Өрөспүүбүлүкэ күнүнэн уонна Россия Парламентаризмын күнүнэн эҕэрдэлиибин!
Муус устар 27 күнүгэр биһиги үс дьоһун түгэни – Саха Өрөспүүбүлүкэтин төрүттэниитин, Саха Өрөспүүбүлүкэтин саҥа Конституцията (Төрүт сокуона) олоххо киириитин уонна Россия Парламентаризмын күнүн бэлиэтиибит.
1922 сыл муус устар 27 күнүгэр РСФСР састаабыгар Саха Автономнай Сэбиэскэй Социалистическай Өрөспүүбүлүкэтин тэрийэр туһунан Декрети ылыныы Саха сирин норуоттарын национальнай судаарыстыбаннастаах буолууларыгар олугу уурбута уонна биһиги региоммут сайдыытыгар улахан уларытыыны киллэрбитэ.
1992 сыл муус устар 27 күнүгэр Саха сирин саҥа Төрүт Сокуона ылыныллан, Россия Федерациятын тэҥ бырааптаах субъегын быһыытынан Саха Өрөспүүбүлүкэтин правовой төрүтүн бигэргэппитэ, норуоппут салгыы сайдар оҥкулун уурбута. Саха сиригэр судаарыстыбаннаспыт үтүө үгэстэрин харыстааһын уонна бөҕөргөтүү утума чаҕылхайдык көстөр. Өрөспүүбүлүкэ сайдыытын хас биирдии саҥа түһүмэҕэ ааспыт олох ситиһиилэригэр тирэҕирэр уонна Россия састаабыгар судаарыстыбаннаска, омук быһыытынан бэйэни билиниигэ үрдүк таһымҥа тахсар соругу тутуһар.
Бүгүн аан дойду бэлитиикэтэ тыҥаабытын, экэниэмикэҕэ быһыы-майгы кытааппытын үрдүнэн, Сахабыт сирэ дойдубут биир тэтимнээхтик сайдар региона буолар. Өрөспүүбүлүкэ салалтата дьон-сэргэ иннигэр туруоруммут социальнай эбэһээтилистибэлэрин толору мэктиэлиир, олох-дьаһах сайдар кыаҕын тобулар.
Бу күн биһиги Россия парламентаризмын күнүн уонна Судаарыстыбаннай Дума төрүттэммитэ 110 сылын бэлиэтиибит. Саха Өрөспүүбүлүкэтин Ил Түмэнэ Саха АССР Үрдүкү Сэбиэтин утумнааччы быһыытынан парламентаризм сайдыытыгар кылаатын киллэрэр. Өрөспүүбүлүкэ парламена Саха сирин социальнай-экономическай туругун, нэһилиэнньэ олоҕун уйгутун тупсарыы сокуон өттүттэн тирэхтээх буолуутун хааччыйыыга үлэлэһэр. Өрөспүүбүлүкэ парламена Россия Федерациятын Федеральнай Мунньаҕын кытта ыкса үлэлэһэр. Уһук Илиҥҥи регион уонна Арктика зонатын сайдыыларыгар сокуоннары саҥардыыга, ылыныыга Саха сирин этиилэрин туруулаһар, көҕүлээһиннэри киллэрэр.
Күндү Саха сирин олохтоохторо! Эһиэхэ чэгиэн доруобуйаны, ситиһиилээх үлэни, этэҥҥэ буолууну баҕарабын.
