Үрүҥ эһэни харыстыыр сыаллаах-соруктаах аан дойдуга биллэриллибит күн Саха сиригэр хайдах ыытылларын туһунан СӨ Айылҕа харыстабылын министиэристибэтин пресс-сэкирэтээрэ Анна Налимова СИА-ҕа иһитиннэрдэ.
«Олунньу 27 күнэ – аан дойдуга үрүҥ эһэни харыстааһын күнэ. Бу даатаҕа анаан биһиги өрөспүүбүлүкэбитигэр эрдэттэн тиһиктээх, былааннаах үлэ ыытыллар. 2013 сыллаахха Россия үрдүнэн уопсайа 5-6 тыһыынча үрүҥ эһэ баара биллибитэ. Бу сыыппараҕа хамсааһын төһө барарын билэр туһуттан, 2018 сылга уопсай учуоттааһын үлэтэ былааннанар. Онтон биһиги өрөспүүбүлүкэбитигэр 2005 сыллаахтан Аллараа Халыма уонна Аллайыаха оройуоннарыгар үлэ сыллата ыытыллар. Үрүҥ эһэни ааҕыыга-суоттааһыҥҥа СӨ Айылҕа харыстабылын министиэристибэтин ураты харыстанар сирин-уотун, айылҕа харыстабылын, биологическай ресурсаларга Дирекциятын иниспиэктэрдэрэ кытталлар, бу аарыма кыыл туругун кэтииллэр, үөрэтэллэр. Итинник ньыманан үлэлээһин түмүгэр, үрүҥ эһэни сойуолааһын тахсыбат, оттон кыылга-сүөлгэ сөптөөх кэмигэр көмө оҥоһуллар», — диэтэ.
2012 сыллаахха «Медвежий патруль» WWF кыттыылаахтара тулаайах хаалбыт үрүҥ эһэ оҕотун булбуттарын, ол туһунан киэҥник сырдатыллыбытын аҕынна. Билигин Халымаана «Орто дойду» зоопаркаҕа этэҥҥэ турар.
Манна даҕатан эттэххэ, үрүҥ эһэ күнүн Россияҕа, Норвегияҕа, Канадаҕа, Гренландияҕа уонна АХШ бэлиэтииллэр. Итиннэ анаан киэҥ хабааннаах тэрээһиннэри ыыталлар.
