Политолог, история наукатын кандидата, ХИФУ доцена Ольга Парфенова Галина Данчикова оннугар үлэлии кэлэр киһи салайар дьоҕурдаах, хаарчахтаммыт усулуобуйаҕа да түмүгү ситиһэр кыахтаах буолуохтааҕын туһунан СИА-ҕа эттэ.
— Госдумаҕа дьокутаат Галина Данчикованы бырабыыталыстыба бэрэссэдээтэлин дуоһунаһыгар кинини ким солбуйуон сөбүй?
— Биллэн турар, миниистирдэр кабинеттарыгар бу дуоһунаска үлэлиэн сөптөөх дьон бааллар. Региону салайыыга этническэй өттүнэн табыгастаах буоларын туһугар славянин ордук.
— Форумнарга, сорох көрдөрөр-иһитиннэрэр тиһиктэргэ миниистирдэр кабинеттарын ыһыы уонна саҥа састаабы талар туһунан үгүстүк суруйар буоллулар.
— Мин саныахпар, кинилэр суруйалларын хоту буолуо суоҕа. Тоҕо диэтэххэ, бырабыыталыстыбаны үрэйии икки түгэҥҥэ оҥоһуллар: бастакыта, боломуочуйа болдьоҕун бүтүүтэ. Иккиһэ – миниистирдэр кабинеттарыгар итэҕэйбэт буолуу биллэрилиннэҕинэ. Ил Дархан бигэтийбит систиэмэни ыһара табыгаһа суох.
— Үлэлии кэлэр премьер хайдах буолуохтааҕый?
— Туох-ханнык иннинэ кини салайар дьоҕуругар ураты болҕомто ууруллуохтаах. Ил Дархан – норуот аҕа баһылыга, оттон бырабыыталыстыба бэрэссэдээтэлэ ситэриилээх былаас үлэтин сүрүннүүр соруктаах. Премьер хаарчахтаах усулуобуйаҕа да регион, федеральнай таһымнарга ылыллар быһаарыылары олоххо киллэрэри сатыахтаах.
