Остуол тенниһигэр Уһук Илиҥҥи уокурукка бастыҥынан Василий Румянцев ааттанна

0
51
Ааспыт өрөбүлгэ Дьокуускайга остуол тенниһигэр Уһук Илиҥҥи уокурук чөмпүйэнээтэ түмүктэннэ. “Кыайыы 50 сыла” Спорт дыбарыаһыгар түөрт күннээх күрэхтэһии түмүгүнэн Саха сирин теннисистэрэ инники күөҥҥэ таҕыстылар. Күрэхтэһии кыайыылаахтара уокурук сүүмэрдэммит хамаандатыгар киирэн, олунньу ыйга Пенза куоракка ыытыллар дойду чөмпүйэнээтигэр кыттыахтара.

Эр дьоҥҥо хамаанданан бастыыр иһин күрэскэ Амур уонна Хабаровскай күүстээх маастардарын үһүскэ үтэйэн Василий Румянцев, Ньургун Сабарайкин, Анатолий Ефремов, Михаил Кылабысов, Богдан Капитонов састааптаах Саха сирин хамаандата иккис миэстэҕэ таҕыста. Манна кыайыылааҕынан Приморье теннисистэрэ буоллулар.

Дьахталларга Приморье хамаандата бастаата. Екатерина Лыппахова, Ольга Тихонова, Вероника Степанова, Марфа Колодезникова, Александра Ефимова Саха сирин хамаандатын иккис миэстэҕэ таһаардылар.

Уол-кыыс буолан күрэстэһиигэ Сабарайкин Ньургун — Петрова Айыына (Саха сирэ) Петрук Дмитрийы, Кремер Алинаны кытта (Приморье-Хабаровскай) үһүс бириистээх миэстэни ыллылар.

Эр дьоҥҥо пааранан оонньууга кыайыылааҕы быһаарар көрсүһүүгэ Василий Румянцев — Сабарайкин Ньургун (Саха сирэ) Амур теннисистэрин Андрей Ильяшенконы, Павел Бредневы 3:0 ахсаанынан (11:7, 11:9, 11:8) баһыйа туттулар.

Дьахталларга Сафина Виолетта — Кремер Алина (Приморье) пьедестал үрдүкү үктэлин дабайдылар. Манна Лыппахова Екатерина — Тихонова Ольга (Саха сирэ) боруонса мэтээллэринэн наҕараадаланнылар.

Биирдиилээн бастыыр иһин күрэскэ эр дьоҥҥо Василий Румянцев (Саха сирэ) түмүк оонньууга Приморьеттан сылдьар спорт маастарын Ли Сергейы 4:1 ахсаанынан хотто. Манна Сабарайкин Ньургун (Саха сирэ) боруонса призерунан буолла.

Дьахталларга Приморье теннисистэрэ аҥардастыы аатырдылар. Ол курдук, Сафина Виолетта кыһыл көмүс мэтээли ылла. Кини дьүөгэлэрэ Кремер Алина — иккис, Гулакова Светлана, Дударь Алена үһүс бириис бириистээх миэстэлэргэ таҕыстылар.

 Күрэстэһээччи санаата

Василий Румянцев, остуол тенниһигэр спорт маастара, Уһук Илиҥҥи уокурук түөрт төгүллээх чөмпүйүөнэ:

—Бэҕэһээ уокурук чөмпүйүөнэ Егор Тимины кытары олус тыҥааһыннаах оонньуу буолбута. Сырам-сылбам баранан туран 4:2 ахсаанынан хоппутум. Онно, кырдьыгынан билиннэххэ, дьиэм истиэнэлэрэ көмөлөспүттэрэ.

Күрэхтэһии түмүгүнэн астынным. Уокурук түөрт төгүллээх чөмпүйүөнүнэн буоллум. Мин билигин Арассыыйа кулуубунан чөмпүйэнээтин премьер-лигатыгар Архангельскай аатыттан оонньуубун. Онно аан дойду күүстээх теннисистэрэ кытталлар. Сотору турнирбыт саҕаланыаҕа. Онно кыттыым дойду чөмпүйэнээтигэр бэлэмнэниибинэн буолуоҕа.

Судьуйа санаата

Александр Неустроев, норуоттар икки ардыларынааҕы кылаастаах уонна Арассыыйатааҕы категориялаах судьуйа, күрэхтэһии сүрүн судьуйата:

— Өрөспүүбүлүкэбитигэр иккис төгүлүн ыытыллыбыт Уһук Илиҥҥи уокурук чөмпүйэнээтин остуол тенниһин сөбүлээччилэргэ дьиҥ-чахчы спорт бырааһынньыгар кубулутарга кыһаллан үлэлээтибит. Бу күрэхтэһии Саха сиригэр остуол тенниһэ сайдыытыгар өссө биир төһүүнэн буолуо диэн эрэнэбин.

Остуол тенниһигэр Уһук Илиҥҥи уокурук чөмпүйэнээтин кыайыылаахтара уонна призердара:

2018 сыл тохсунньу 24—28 күннэрэ, Дьокуускай.

Биирдиилээн бастыыр иһин күрэхтэһии

Эр дьон

  1. Василий Румянцев (Саха сирэ)
  2. Сергей Ли (Приморье)
  3. Ньургун Сабарайкин (Саха сирэ)
  4. Михаил Бутылев (Приморье)

Дьахталлар

  1. Виолетта Сафина (Приморье)
  2. Алина Кремер (Приморье)
  3. Светлана Гулакова (Приморье)
  4. Алена Дударь (Приморье)

Уол-кыыс буолан күрэхтэһии

  1. Иван Леонов/Светалана Гулакова (Сахалин/Приморье)
  2. Егор Тимин/Антонина Ноздреватых (Приморье/Хабаровскай)
  3. Ньургун Сабарайкин/Айыына Петрова (Саха сирэ)
  4. Дмитрий Петрук/Алина Кремер (Приморье/Хабаровскай)

Пааранан оонньууга

Эр дьоҥҥо

  1. Василий Румянцев/Ньургун Сабарайкин (Саха сирэ)
  2. Андрей Ильяшенко/Павел Бреднев (Амур)
  3. Константин Алатырцев/Олег Пешко (Приморье)
  4. Егор Тимин/Дмитрий Петрук (Приморье)

Дьахталларга

  1. Виолетта Сафина/Алина Кремер (Приморье)
  2. Антонина Ноздреватых/Евгения Ветрик (Хабаровскай)
  3. Екатерина Лыппахова/Ольга Тихонова (Саха сирэ)
  4. Светлана Гулакова/Алена Дударь (Приморье)

Хамаанданан күрэхтэһии

Эр дьоҥҥо

  1. Приморье (М.Бутылев, С.Ли, Е.Тимин, Д.Петрук, Д.Алмазов)
  2. Саха сирэ (В.Румянцев, Нь.Сабарайкин, А.Ефремов, М.Кылабысов, Б.Капитонов)
  3. Хабаровскай кыраай (Е.Пономаренко, А.Шаршиков, К.Алатырцев)
  4. Амур уобалаһа (П.Бреднев, А.Ильяшенко, Р.Соколов)

Дьахталларга

  1. Приморье (В.Сафина, С.Гулакова, А.Кремер, Д.Ткачук, А.Дударь)
  2. Саха сирэ (Е.Лыппахова, О.Тихонова, В.Степанова, М.Колодезникова, А.Ефимова)
  3. Хабаровскай кыраай (А.Ноздреватых, В.Кобылина, Е.Ветрик, О.Маринина)
  4. Магадан уобалаһа (А.Салашная, А.Гильманова, Е.Краюца, Р.Будяк)
0
0