Бастакы Мээтискэ
С.А.Третьякова уонна үөрэх улуустааҕы управлениетын специалиһа П.Н.Иванов үөрэх тэрилтэлэрин үлэтин-хамнаһын кытта билистилэр. Тохсунньу 26 күнүгэр Бастакы Мээтис нэһилиэгэр 47 кыраадыс тымныы буолан, 1-5-с кылаас үөрэнээччилэрэ үөрэммэтэхтэр. Оскуола сорох кабинета температурнай режимҥэ эппиэттээбэт, холобур, начаалынай кылаас кабинета 6 эрэ кыраадыс сылааһы көрдөрөр. Орто сүһүөх оҕолоро биир кылааска тас таҥастаах үөрэнэргэ күһэллэллэр.
„Кэнчээри“ оҕо саадын үлэһиттэрэ дьиэ алларанан тымныытын бэлиэтээн, линолеум наадатын эттилэр. Ону тэҥэ,тас таҥаһы устар хоско өссө биир ититэр система турара буоллар, киирии-тахсыы кэмигэр сылаас буолуо этэ диэтилэр.
Улуус дьаһалтатын отчуота презентациянан эмиэ көрдөрүллүбүтүн дьон биһирээн иһиттэ. Ол гынан баран, мунньах сарсыарда ыытыллан, сорох дьон үлэлии сылдьан кыайан кэлбэтэх. Онон нэһилиэк олохтооҕо Иннокентий Максимов мунньах киэһэ өттүгэр буоларыгар баҕарда.
Кэпсэтии сүрүн боппуруоһа коммунальнай хаһаайыстыбаҕа ананна. Билиҥҥи туругунан, 51 ыал киин хочуолунайга холбонон олорор, ол иһигэр 11 тыыл бэтэрээнэ киин ититэр ситимҥэ холбоммут. Нэһилиэккэ коммунальнай хаһаайыстыбаттан үһүс сылын ким да кэлбэтэҕэ хомотор.
Олохтоох Сэбиэт депутата Олег Слепцов буруйу оҥорууга күүстээх сэрэтэр үлэ ыытылларыгар, сокуона суох арыгы атыылааһыныгар ыйга иккитэ бэрэбиэркэ ыытылларыгар этии киллэрдэ. Биэнсийэлээх киһи эмтэнэригэр быраастар эмиэ интэриэстээх буолалларыгар, холобур, эмп-томп кэлбитин төлөпүөнүнэн биллэрэн, аҕалан биэрэн көмөлөһөллөрүгэр баҕарда.
Александра Слепцова Сбербаан үлэтин мөлтөҕүн, нэдиэлэҕэ иккитэ эрэ үлэлиирин эттэ.
Нэһилиэнньэ ордук инбэлиит киһи, соҕотох төрөппүт дьиэ туттарыгар, өрөмүөнүгэр туох көмө баарын, ханнык бырагыраамалар үлэлииллэрин ыйыталаста.
Сиэн Күөлүгэр
Отчуоттуур бөлөх Сиэн Күөлүгэр С.Н.Горохов аатынан Ойуһардаах орто оскуолатыгар, „Ладушка“ оҕо саадыгар уонна учаастактааҕы балыыһаҕа сырытта.
Оскуолаҕа саамай тымныы кабинекка термометр 9 кыраадыһы көрдөрөр. Дьиэни ититиигэ элбэх үлэ ыытыллыбыт, биирдиилээн хос өрөмүөннэммит, муоста анныгар буор кутуллубут буолан, сылыйбыта биллибит. „Ладушка“ оҕо саадыгар кырачааннар этэрбэстээх, халыҥ ыстааннаах сылдьаллар. Сорох хос тымныытыттан, оҕолор онно дьарыктамматтар.
Учаастактааҕы балыыһа саҥаттан тутуллубута эрээри, сылыйбыта биллибэт. Муостаны инчэҕэйинэн соттохторуна, сонно тоҥор буолан, мууһунан килэйэ сытар. Түннүктэр халыҥ таҥаһынан сабыллыбыттар, үлэһиттэр сылытар тэриллээх олорон үлэлииллэр.
Нэһилиэккэ Таалалаах түөлбэнэн саҥа ититэр ситим тардыллыбыт эрээри, манна холбоммут ыалга итии тиийбэт буолан, эбии маһынан оттунан олороллор. Коммунальнай хаһаайыстыба специалистара кэлэн ситим сыыһа тардыллыбытын бигэргэппиттэр, ол гынан баран ону уларытарга үлэ барбатах.
Нэһилиэнньэ уонча сыл туруорсар тыын боппуруоһунан дьиэлэр тымныылара буолар. Мантан сылтаан оҕолор ыалдьаллара элбиирин учуутал Галина Горохова эттэ, кини мониторинг оҥорбутун кэпсээтэ. Нэһилиэк дьаһалтатын бюджетын тыырыыны улуус дьаһалтата бэрэбиэркэлииригэр, хонтуруолга ыларыгар этии киирдэ.
Бастакы Мээтис уонна Сиэн Күөлүн нэһилиэктэрин олохтоохторо ый аҥаара курдук алларанан суол аһыллыбатаҕын бэлиэтээтилэр. Суол суоҕунан сибээстээн, хаһыат, сурунаал эмиэ хойутаан кэлэр буолбут.
Икки нэһилиэккэ баҕа санаа быһыытынан социальнай эйгэ үлэһиттэригэр нэһилиэнньэни кытта ыкса үлэлэһэллэригэр эттилэр итиэннэ мунньахтарга бары хайысхалартан специалистар кытталларыгар көрдөстүлэр.
