Рио-де-Жанейро Олимпиадатыгар тустууга кыайыылаах үрдүк аатын ылбыт турок Таха Акгюль кини сахалар удьуордара буоларын туһунан эттэ. Аан дойду икки төгүллээх чөмпүйүөнэ Дьокуускайга Дмитрий Коркин кэриэһигэр анаммыт норуоттар икки ардыларынааҕы IX-с турнир бочуоттаах ыалдьыта буолла.


Саха сирин дьоно истиҥник көрсүбүттэригэр махтанабын. Манна кэлбиппиттэн үөрүүм муҥура суох улахан. Өрөспүүбүлүкэҕэ элбэх күүстээх тустууктар бааллар. Оскуолаҕа үөрэнэ сырыттахпына, сахалары кытта биһиги биир төрүттээхпит туһунан кэпсээбиттэрэ», —диир Таха Акгюль.

Дмитрий Коркин турнира спорсменнар кыахтарын тилэри аһалларыгар бигэ олугу уурарын кини ордук бэлиэтээн эттэ. Түөрт сыллааҕыта бу чөмпүйэнээккэ кыттыы киниэхэ норуоттар икки ардыларынааҕы таһымнаах бастакы уопут буолбутун чиҥэтэн эттэ.

«Онон бу турнир миэхэ ылар суолтата, оруола олус улахан. Аан дойду таһымыгар кыттар тустууктар бары маннык уонна маныаха майгынныыр күрэхтэһиилэри ааһаллар. Түөрт сыллааҕыта мин манна тустубутум. Ол эрээри бастакы эргииргэ тута хотторбутум. Олимпиада биир цикылын иһигэр бочуоттаах ыалдьыт буолан турарбыттан улаханнык үөрэбин. Ити иһин дьылҕабар махтанабын», — диэтэ ыалдьыт.

Таха Акгюль Европа уонна аан дойду чөмпүйэнээттэригэр кыттар былааннаах. Аны түөрт сылынан Токио тустуутун көбүөрүгэр тахсар соруктаах.

1
0
comments powered by HyperComments