Уус Алдан улууһун дьаһалтата ойуур баһаарыттан хоромньу көрсүбүт олохтоох фермердэргэ анаан көмө көрдөөн сайаапка суруйар. Санатар эбит буоллахха, Ил Дархан Айсен Николаев өрөспүүбүлүкэ туһааннаах салалтатыгар кыһалҕалаахтарга көмө оҥорору сорудахтаабыта, суруйар СИА.


Уус Алдан улууһугар ойуур баһаарыттан сылтаан, 295 туонна бэлэмнэниллибит от умайда. “Ааҕыы өссө барар. Быйылгы кураан элбэх кыһалҕаны оҥордо: от үүммэтэ, баһаардар. Олохтоохтор сайын устата элбэх үлэни ыыттылар — оттооһуҥҥа туруоруллубут былааны 93 бырыһыан толордулар, дьиҥэр, барыллаан былаан быһыытынан, 60 эрэ бырыһыан кэлиэх курдуга“, – СИА-ҕа улуус баһылыга Алексей Федотов кэпсээтэ.

Ойуур баһаарыгар Өнөр, Бээрийэ, Өспөх, Түүлээх нэһилиэктэригэр бэлэмнэниллибит от былдьанна.

“Онон, эбии оту атыылаһыыга бэлэмнэниллибит докумуоҥҥа 1080 туонна диэн ыйыллыбыт буоллаҕына, сыыппара билигин улаатарыгар тиийэр. Сайаапка суруйабыт, тыа хаһаайыстыбатын министиэристибэтин кытта ыкса үлэлиибит. Бэлиэтээн этиэххэ наада, өрөспүүбүлүкэ салалтата оттооһун кэмигэр мобильнай этэрээттэри туруоран улахан көмөнү оҥордо. Билигин ойуур баһаардара туран, фермердарга кыһалҕа үөскээбит кэмигэр Айсен Сергеевич, суһал штаб, министиэристибэлэр куруук сибээскэ бааллар, онон көмө баар буоларыгар эрэллээхпит. Оттон биһиги кыстык этэҥҥэ ааһарыгар миэстэтигэр кыһаллыахтаахпыт, сүөһү төбөтүн аҕыйатыа суохтаахпыт“, – диэтэ оройуон салайааччыта.

Бүгүн бөдөҥ хаһаайыстыбалаах фермердэри кытта мунньах буолар.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.