Ньурба улууһугар Марха өрүһү туоруур муостаны «Сибмост» тутар. Километр аҥаара уһуннаах муоста баар буолбутун түмүгэр Братскай куораты нөҥүөлээн «Байкал» массыына суола, Уус Кут, Мииринэй уонна киин куорат ситимнэниэхтэрэ.
Марха өрүһү туоруур муоста «Бүлүү» суол 756 км баар буолуоҕа. Тутуу 2018 сыл сэтинньитигэр диэри бүтүөхтээх. Ону таһынан 55 уонна 34 м уһуннаах икки муостаны Маар өрүһү туорааһыҥҥа анаан оҥоруохтара.
Үлэ иһин 4,74 млрд солк. федеральнай бюджеттан көрүлүннэ.
«Сибмост» тэрилтэ хоту сирдэргэ муостаны тутар уопуттаах. 2011 сылтан 2015 сылга диэри илиҥҥи Хаандыга, Таатта, Тамма, о.д.а. өрүстэри туоруур муосталары туппута биллэр.
