Бу күннэргэ инбэлииттэр ортолоругар идэ мастарыстыбатын «Абилимпикс» чөмпүйэнээтэ буола турар. Бу аан дойдуга киэҥник тарҕаммыт хамсааһын Арассыйаҕа саҕаламмыта сыл буолла.
Саха сирин оройуоннарыттан уонна куораттарыттан 25 кыттааччы «Повар», «Кондитер», «Сетевой уонна систиэмнэй администрирование», «Бортунуой» уонна «Экономика уонна бухгалтерия учуота» идэлэргэ бастыыр иһин күрэстэстилэр.
«Бортунуой» идэтигэр кыттааччылар сайыҥҥы былаачыйаны хотуобай быыкарайканан тиктилэр. Манна идэтийбит да дьон, устудьуоннар да кытыннылар.
29 саастаах Людмила Андреева кэтэх тэрилтэтин үлэлэтэр. Манна кини көстүүмнэри, киэһээҥҥи былаачыйалары тигэр. Кини үлэтин олус сөбүлүүр уонна бэйэтэ үөрэммит кыһатын аатыттан күрэхтэһиигэ кыттар. Людмила инбэлииттэр өрөспүүбүлүкэтээҕи техникум-интэрнээттэригэр үөрэммит.
«Мин офиска кэтиллэр көстүүмнэри, сахалыы халадаай былаачыйалары тигэбин. Киэһээҥҥи былаачыйа тигэрбин туохтааҕар да ордоробун», — диэн кини СИА-ҕа кэпсээтэ.
Атын дьиэҕэ повардар фруктаттан уонна холбуйуу сүөгэйтэн минньигэс аһы оҥорууга күрэхтэстилэр.
«Бэҕэһээ биһиги отонунан тумаламмыт куурусса буутун астаабыппыт. Олус интэриэһинэй этэ. Мин «Тото-Хана» рестораҥҥа үлэлиибин. Бурдук аһы астыырбын сөбүлүүбүн», — диэн кыттааччылартан биирдэстэрэ Айал Харитонов кэпсээтэ.
Сергей Филиппов быйыл Дьокуускайдааҕы технологическай сервис техникумун үөрэнэн бүтэрбит. Аһы киэргэтэн остуолга уурууга кэккэ ыарахатары көрсүбүтүн туһунан бэлиэтээтэ.
Сүрүн эксперт Саргылана Дохунаева кыттааччылар аһы астыыр тиэхиньикэлэригэр, ас амтаныгар, тас көрүҥэр ураты болҕомто уурулларын ыйда. «Оҕолор туруоруллубут соругу ситистилэр. Маннык чөмпүйэнээттэр олус наадалаахтар. Кинилэр уопсастыбаҕа бэйэлэрин миэстэлэрин булалларыгар бу тэрээһин көмөтө тугунан да кэмнэммэт», — диир кини.
«Абилимпикс» аан дойдутааҕы хамсааһын саҕаламмыта быданнаата. Оттон Арассыыйаҕа саҥа саҕаланна. Саха сирэ биэс кыттааччытын туруорар. Эһиилгиттэн ыла манна оскуола үөрэнэччилэрин түмэ тардыахпыт», — диэтэ профессиональнай үөрэхтээһини сайыннарыы киинин генеральнай дириэктэрин солбуйааччы Владислав Хабаров.
Күрэхтэһии кыайыылаахтара сэтинньигэ Москва куоракка национальнай чөмпүйэнээккэ кытта барыахтара.
