Мерзлоткаҕа фекалийы көҥүлэ суох сиргэ тохтулар

0
40

Бу туһунан СӨ Айылҕа харыстабылын министиэристибэтин пресс-сулууспата иһитиннэрдэ.


Айылҕа харыстабылын кэмитиэтин иниспиэктэрдэрэ Дьокуускайга уонна куорат таһынааҕы бөһүөлэктэргэ бөҕү-саҕы, кирдээх убаҕаһы көҥүлэ суох тоҕууну тиһиктээхтик бэрэбиэркэлииллэр. Рейдэҕэ СӨ Айылҕа харыстабылын министиэристибэтин үлэһиттэрэ уонна иниспиэктэр Олеся Сафронова сырыттылар.  Олеся Михайловна кирдээх убаҕаһы көҥүлэ суох тоҕуу биһиги куораппытыгар куруутун тахса турарын бэлиэтиир.

Быйыл олунньуга Билибин уулуссатыгар уонна Марха микро-оройуонугар кирдээх убаҕаһы таһар анал массыыналаахтар тоҕуохтаах анал ыстаансыйаҕа ситэ тиийбэккэ канализационнай холуодьастарга кутаннар, ыстараап «уобан» туралларын туһунан СӨ Айылҕа харыстабылын министиэристибэтэ иһитиннэрбитэ. Онуоха ассенизатордар Сэбиэскэй Аармыйа 50 сыла уулуссаҕа баар кирдээх убаҕаһы тоҕор анал ыстаансыйаҕа харчыларын кэмчилээн тиийбэттэрин, онно тиэрдэргэ биир рейскэ 700 солк.төлүүллэрин эппиттэр.

Быйыл Билибин уулуссатыгар иниспиэктэрдэр кирдээх убаҕаһы тоҕуу чахчыта баарын бэлиэтээбиттэринэн, рейдэ оҥорооччулар аан бастаан онно тиийбиттэрэ люктар иккиэн  чиҥник сабыллан тураллара, фекалийы онно тоҕоллоро тохтотуллубута бигэргэммит. Оттон Мерзлотка оройуонугар кирдээх убаҕаһы, тобоҕу аара “таптаан” тоҕор сирдэригэр тиийэн кэтээһиннэрэ таах хаалбатах. Сотору буолаат, биир ассенизатор кэлэн люгунан кирдээх убаҕаһы сүөкээбитинэн барбыт.

Онон госиниспиэктэр Олеся Сафронова 8.2 КоАП РФ ыст. административнай кэһии туһунан боротокуолу толорбут.  Гражданин Г. кирдээх убаҕаһы таһыынан бэйэтэ дьарыктанарын, харчытын кэмчилээн анал ыстаансыйаҕа ситэ тиийбэккэ аара тохтообутун билиммит.

Маныаха иниспиэктэр маннык быһыылар сотору-сотору тахсалларыттан сонньуйар.

“Анал көлөлөөх чааһынайдар фекалийы көҥүллэммэт сиргэ тоҕоллор, ирдэбили тутуспаттар. Кирдээх убаҕаһы, тобоҕу, бөҕү бэрээдэгэ суох көҥүллэммэт сиргэ сүөкээһин түмүгэр, канализационнай ситим бүөлэнэр. Маннык ыһа-тоҕо сылдьыыттан тулалыыр эйгэ киртийэрин, куорат олохтоохторо эрэйдэнэллэрин өйдөөбөттөр”, — диир. Дьиҥэр бөҕү-саҕы, кирдээх убаҕаһы тоҕууга үлэһээччи, толорооччу уонна онно эппиэтинэстээх тэрилтэлэр болҕомтолоох буолуохтаахтар. Бу кыһалҕаны бары өйдүүр буоллахпытына итиэннэ ону туоратарга көмөлөөн үлэлээтэхпитинэ эрэ куораппыт, бөһүөлэктэрбит, тулалыыр эйгэбит ырааһырарын ситиһиэхпит диэн этэллэр СӨ Айылҕа харыстабылын министиэристибэтин үлэһиттэрэ.

Хаартыскалар: СӨ Айылҕа харыстабылын министиэристибэтин пресс-сулууспатыттан ылылыннылар.

0
0
[the_ad_group id="742"]