Мэҥэ Хаҥалас улууһун олохтоох «Эркээйи» хаһыатын үлэһиттэрэ үбүлүөйдээх Улуу Кыайыы 75 сылын көрсө “Бэтэрээҥҥэ хаһыакка сурутууну бэлэхтээ” аахсыйаҕа кыттар уонна биир дойдулаахтарын ыҥырар. Бу күннэргэ нэһилиэк баһылыктара үтүө дьыалаҕа кытталлар.


«Саҥа сылга үктэнэрбит бэрт кылгас кэм хаалла. Биир ый хаалла. Үүнэр сылга Улуу Кыайыы 75 сылын өрө көтөҕүллэн бүттүүн бэлиэтиэхпит. Кэрэ-бэлиэ өрөгөйдөөх үбүлүөй тэрээһинигэр олох бары эйгэтин, салааларын хабан, Мэҥэ Хаҥалас улууһугар ааспыт сылтан салҕанан барар. Биирдиилээн дьон, тэрилтэлэр, уопсастыбаннай түмсүүлэр, холбоһуктар көҕүлээһиннэринэн сэрии, тыыл бэтэрээннэригэр, аҕам саастаах дьоҥҥо араас хайысханан аадырыстаах көмөнү оҥорууга туһаайыллар үлэ үксээн иһэрэ үөрдэр», — диир «Эркээйи» хаһыат кылаабынай эрэдээктэрэ Алена Докторова.

Өрөспүүбүлүкэ таһымыгар “Бэтэрээҥҥэ хаһыакка сурутууну бэлэхтээ” аахсыйа бара турар. “Саха сирэ”, “Якутия” хаһыаттарга СӨ Ил Дархана Айсен Николаевтан саҕалаан, кэккэ министиэристибэлэр, биэдэмистибэлэр салайааччылара кэлэр сылга сэрии, тыыл бэтэрээннэригэр сурутууну бэлэхтээтилэр.

«Эркээйи» хаһыат үлэһиттэрэ саамай ытыктыыр дьонноругар ‒ бэтэрээннэргэ маннык көмө аахсыйа ыытылларын толору биһириирин, өйүүрүн биллэрэр. «Бэйэбит улууспутугар оройуон хаһыатыгар сурутууга урукку сыллартан маннык аахсыйаны көҕүлээн кэлбиппит уонна быйыл өрөспүүбүлүкэҕэ саҕаламмыт үтүө холобуру батыһарга үлэбитин-хамнаспытын ыытабыт. Икки сыллааҕыта  дойдубут, өрөспүүбүлүкэбит салалталара көмөҕө наадыйар нэһилиэнньэ араҥатыгар аадырыстаах көмөнү оҥорууга туһуланар ыйаахтарыгар олоҕуран, «Үтүөнү батыс» аахсыйаны тэрийбиппит. Манна Майа, Хара, Аллараа Бэстээх, Нөөрүктээйи, Төҥүлү, Дьабыыл, Ороссолуода, Хаптаҕай, Дьаҥхаады, Хорообут, Алтан, Ходоро, Чыамайыкы, Моорук, 2-с Наахара, Баатара, Бэдьимэ, 1-кы Тыыллыма нэһилиэктэрин баһылыктара, тэрилтэ салайааччылара, биирдиилээн дьокутааттар, предпринимателлэр элбэх оҕолоох дьиэ кэргэттэргэ, инбэлииттэргэ, тыыл бэтэрээннэригэр, көхтөөх уопсастыбанньыктарга оройуон хаһыатын бэлэх быһыытынан суруттарбыттара«, — диир эрэдээктэр.

Алексей Иванович Григорьев

Сергучев Сергей Иннокентьевич

Бурнашев Гаврил Анатольевич

Быйылгы тэрээһиннэрин эрэдээксийэлэр улуус нэһилиэктэрин баһылыктарыттан саҕалаабыттара түбэһиэхчэ буолбатах. Кинилэргэ хаһыаты сурутууга, таһыыга мэлдьитин күүс-көмө, өйөбүл буолалларыгар махталлара муҥура суох. “Бэтэрээҥҥэ хаһыакка сурутууну бэлэхтээ” аахсыйаҕа бастакынан 1-кы Наахара нэһилиэгин баһылыга Алексей Григорьев кыттыста. Кини нэһилиэк дьаһалтатын аатыттан Улуу Кыайыы 75 сылынан 20 киһиэхэ оройуон хаһыатын биир сыллааҕы сурутуутун бэлэхтээн, үтүө холобуру көрдөрдө. Алексей Иванович, аныгылыы тылынан эттэххэ, челлендж эбэтэр аахсыйаҕа салгыы кыттыһарга ыҥырыыны Дьабыыл нэһилиэгин баһылыгар Сергей Сергучевка тириэртэ. Сергей Иннокентьевич кэккэ сыллар усталарыгар нэһилиэгин дьонун оройуон хаһыатыгар сурутууга көҕүлээн көхтөөх үлэни ыытан кэлбитин бэлиэтиир тоҕоостоох. Бу да сырыыга үтүө хамсааһыны өйөөн нэһилиэгин 20 олохтооҕор сыллааҕы сурутууну бэлэхтииргэ быһаарынна. Кини салгыы аахсыйа эстэпиэтэтин Тараҕай нэһилиэгин баһылыгар Гаврил Бурнашевка туттарда. Гаврил Анатольевич  аахсыйаны өйөөн, эмиэ 20 киһиэхэ хаһыакка сыллааҕы сурутууну бэлэхтииргэ быһаарынна.

Бу тэрээһиҥҥэ аҥаардас нэһилиэктэр баһылыктара эрэ буолбакка, тэрилтэлэр салайааччыларын, боропсойуустары, предпринимателлэри, биирдиилээн дьону  барыларын кыттыһарга «Эркээйилэр» ыҥыраллар. Майаҕа “Герой Попов” түөлбэ олохтоохторо тыыл бэтэрээнигэр “Эркээйи” хаһыакка сурутуу бэлэхтээбиттэрин үөрэ, махтана бэлиэтиибит итиэннэ кинилэри улууспут нэһилиэктэрин олохтоохторо батыһалларыгар эрэллээхпит, диэн Алена Викторовна СИА-ҕа иһитиннэрдэ.

 

0
0
comments powered by HyperComments