“Алданзолото” АУо фабрикатын иһигэр сылдьабыт. Руданы байытар миэлиҥсэ-агрегаттар үлэлиир тыастара улахана сүрдээх, биир кэм өрө ньиргийэн олорор. Ити айылаах тыаһы үлэһиттэр күнү күннүктээн хайдах тулуйаллара эбитэ буолла? Биһиги чаас кэриҥэ сылдьаары, сөрү-сөп буоллубут.
Ити айылаах тыаска миэлиҥсэ аттыгар үлэлии сылдьар исписэлиистэн үөгүлээн кэриэтэ “Дорообо, үлэ этэҥҥэ бара турар дуо?”, — диэн ыйытабын. Киһим тута диспетчерскэй диэки ыйда уонна ол диэки супту хаамта. Кэнниттэн батыстым. Диспетчерскэй аана сабыллаатын кытта тыас лаппа намыраата, киһи төһө баҕарар кэпсэтэр кыахтанна.
«Үтүө күнүнэн, машиниһынан ахсыс сылбын үлэлиибин, Дмитрий Тулаев диэммин. Үлэ этэҥҥэ барар, — диэн киһим кэпсээн-ипсээн барда. — Аармыйаттан сулууспалаан кэлээт, манна тута киирбитим. Бастаан утаа миэлиҥсэ машиниһын үөрэнээччитинэн сылдьыбытым. Аҕыс сыл устата фабрикаҕа үрдүттэн үөрэнэ-үөрэнэ 4-с разряды ылары ситистим. Онон хайа рудатын байытар миэлиҥсэ машиниһа диэн куорачыкалаахпын. Үлэ сменанан барар. Холобур, маҥнайгы сменаҕа турааччылар сарсыарда аҕыс чаастан түөркэ диэри, иккистэр түөртэн түүн 12 чааска диэри, салгыы 12 чаастан сарсыарда аҕыска диэри үлэлиибит. Миэлиҥсэ тохтоло суох үлэлиирин хааччыйабыт. Бүгүн мин түөрт чаастан түүн 12 чааска диэри турабын. Нэдиэлэҕэ үс күн үлэлиибин, икки күн өрүүбүн«.
Сүрүн эбээһинэһэ — миэлиҥсэни көрөн-истэн үлэлэтии
Дмитрий миэлиҥсэҕэ руданы үлтүрүтүү бырассыаһа хайдах барарын көрөн-истэн хонтуруоллуур. Холобур, бу шаровой диэниллэр миэлиҥсэлэр ньиргийэн үлэлии тураллар. Баларга орто гына үлтүрүтүллүбүт руданы кумах буолуор диэри мэһийэллэр эбит. Смена кэмигэр маастардар хас чаас аайы миэлиҥсэлэр хайдах үлэлии туралларын көрөллөр. Ол курдук, руданы төһө үчүгэйдик мэһийэрин, төһө арыы баарын-суоҕун, анал носуостар хайдах үлэлии туралларын бэрэбиэркэлииллэр. Ыксаллаах быһыы-майгы биирдэ эмит буолар. Уот күүрүүтэ эмискэ түстэҕинэ, агрегаттар тохтоон хаалар түгэннэрэ тахсыталыыр эбит. Итинник түгэннэр фабрика үлэтин атахтаабаттар, сменаҕа турааччылар бары түмсэ охсон, агрегаттары көрүөх бэтэрээ өттүгэр собуоттаан үлэлэтэллэр.
Идэбин үрдэтиэм
— Салгыы үрдүүр киһи бэрт этэ. Ити билигин тута кыаллыбат. Бастаа утаа, үөрэниэхпин наада. Саатар, Алданнааҕы техническэй техникумҥа үөрэнэр киһи. 5-с разряды ылар сорук турар. Оччоҕуна хамнаһым 15 тыһ. солк үрдүө этэ. Ааспыкка көмүскээн көрбүтүм даҕаны, биэрбэтэхтэрэ. Билбэтим элбэх этэ. Ол сөп. Дьиҥэр, идэни үрдэтэр куурустарга сырытыннаран баран, ыйытыахтаахтар этэ буоллаҕа. Ол гынан баран, 5-с разряды ылан баран тэйэр киһи буолуом. Соторутааҕыта салалта үөрэтиэхпит диэн эрэннэрбитэ. Ону күүтэ сылдьабын.
Иллэҥ кэммэр спортивнай комплекска дьарыктанабын. Үлэһиттэр бары онно сылдьан сөтүөлүүллэр, сүүрэллэр, мээчик тэбэн футбуоллууллар, мээчиги тэйитэн баскетбуоллууллар, билиардыыллар. Онон үлэлииргэ уонна сынньанарга бары өттүнэн сөптөөх усулуобуйа толору баар.
