Мэҥэ Хаҥалас улууһугар физкултуура уонна успуорт сыла биллэриллэн, ордук быйылгыттан оҕо сынньанар успуорт былаһааккаларын туттарыы нэһилиэктэргэ элбээтэ.
Соторутааҕыта улуус баһылыга Николай Старостин көҕүлээһининэн, урбаанньыттар Иван Никифоров, Сергей Кривогорницын быһа өйөөһүннэринэн, сири бас билии агентствотын салайааччы Дмитрий Тихонов, улуустааҕы физкултуура уонна успуорт управлениетын начаалынньыга Александр Брызгалов, «Урожай» физкултуура уонна успуорт уопсастыбатын бэрэссэдээтэлэ Виталий Пестряков кыттыыларынан Майаҕа «Бадаайы» түөлбэҕэ оҕолор эт-хаан өртүнэн сайдалларыгар анаан успуорт былаһаакканы тутары саҕалаатылар.
Бу күннэргэ тутууга үлэлээччилэри түөлбэ олохтоохторо сылаас аһынан күндүлүүллэр. «Бадаайы» түөлбэ салайааччыта Акулина Скрябина түөлбэҕэ оҕо былаһааккатын туруорсубуттара хас да сыл буолбутун кэпсээтэ. Былаһаакканы туттарыы туһунан туруорсуу үлэтэ түөлбэ салайааччытынан үлэлээбит Маргарита Стручкова саҕана саҕаламмыт эбит.
‒ Улууспутугар успуорт сыла биллэриллэн, успуонсардар көстөннөр, кэнэҕэски ыччаттарбыт үөрэ-көтө кэлэн дьарыктанар, салгыҥҥа сылдьан оонньуур сирдэрэ баар буоларыттан үөрэбит. «Бадаайы» чугастааҕы сытар үс түөлбэ оҕолоро кэлэн эмиэ сынньаныахтара, ‒ диэтэ түөлбэ салайааччыта.
«Арктика-Строй» ХЭТ солбуйааччы дириэктэрэ Иван Никифоров уонна «Татьяна» маҕаһыын салайааччыта Сергей Кривогорницын 200 тыһыынча солкуобайдаах оҕо былаһааккатын Чебоксары куораттан сакаастаан аҕалтарбыттарын эттилэр. Былаһаакка күрүөлээх-хаһаалаах буолар, оҕолор тардынар, эрчилэр тэриллэрэ, хачыаллар, сыырдар, каруселлар туруоруллуохтара.
