Алдан оройуонугар икки тэрилтэ маһы көҥүлэ суох кэрдии иһин улахан суумаҕа ыстарааптанна.
Оройуон борокуратуурата бэрэбиэркэ кэмигэр “Норд Голд” хампаанньа кыһыл көмүһү хостооһун кэмигэр көҥүлэ суох уопсайа 5 гектар иэннээх маһы көҥүлэ суох кэрдэн, ойуур фондатыгар 430 тыһыынча солкуобайтан тахса суумалаах хоромньуну таһаарда.
Маныаха майгынныыр чахчылары “Леспром” ХЭТ хампаанньа таһаарда. Бу тэрилтэ Томмот-Ыллымах массыына суолун өрөмүөнүн ыытыыга 2,76 гектар иэннээх сиргэ маһы кэртэ. Хоромньу кээмэйэ 212 тыһыынча солкуобай.
Оройуон борокуратуурата суукка юридическай сирэйдэртэн уопсайа 642 тыһыыча солкуобай суумалаах ирдэбили түһэрдэ.
Суут борокуруор сайабылыанньатын бигэргэттэ.
Суут уурааҕа сокуоннай күүһүгэр киирэ илик уонна өрүттэр үҥсүү түһэриэхтэрин сөп, диэн өрөспүүбүлүкэ борокуратууратын пресс-сулууспата иһитиннэрдэ.
СИА.
This post was published on 12.12.2018 16:58 16:58