Кытай Шаньдун провинциятыгар Линьи куорат олохтооҕо Дьааҥыттан төрүттээх Сардаана Седалищева «Чуораанчык» өрөспүүбүлүкэтээҕи оҕо сурунаалын кытта тэрийэн ыыппыт «Кытай туһунан мин өйдөбүлүм» уруһуй күрэҕэ түмүктэннэ. Улуу Кытайга тиийэн олохсуйан олорор Дьааҥыттан төрүттээх саха кыыһа, Сандаар уонна Никита диэн игирэ уолаттар тапталлаах ийэлэрэ Сардаана Седалищева «Чуораанчык» сурунаалы кытта «Кытай туһунан мин өйдөбүлүм» диэн уруһуй күрэҕин биллэрбитэ.
Бу күннэргэ Сардаана уолаттарын кытта дойдутугар Саха сиригэр кэлэ сылдьар. Эмдэй-сэмдэй кырачаан уолаттарын сиэппитинэн биһиги эрэдээксийэбитигэр ыалдьыттаата. Сандаар, Никита Сердечнайдар ийэлэрин дойдутугар бу иккис сырыылара. — Кыраларыгар кэлэ сылдьыбыппыт. Билигин онно холоотоххо, уолаттар улаханнар — 2,5 саастара. Онон Саха сиригэр көрбүттэрин барытын дьиктиргииллэр. Куорат уулуссаларын чалбаҕын олус интэриэһиргээтилэр. Хаары көрөн соһуйаллар. Кытайга төрөөбүт, ол дойду аһыгар үөрэммит буоланнар, астарын атыҥырыыллар. Сотору дойдубар Дьааҥыга айанныахпыт. Төрөөбүт дойдубун кытта оҕолорбун төһө кыалларынан ситимниир санаалаахпын, — диэн кэпсиир Сардаана. Саха төрүттээх улуу Кытай уолаттара Сандаар, Никита Сердечнайдар киирэн-тахсан, сүүрэн-көтөн киһини чуҥкуппат дьон. Саҥа тыллан эрэр сир симэхтэрэ, Сардаана Седалищева уонна талааннаах музыкант Андрей Сердечнай сүрэхтэрин чопчулара тулалыыр эйгэни үс тыл нөҥүө — сахалыы, нууччалыы, кытайдыы арыйаллар. Ийэлэрин кытта үс тылынан наадаларын холкутук быһаарсаллар. Оҕо сурунаалын эрэдээксийэтигэр ыалдьыттаан, «Чуораанчык» ааҕааччылара оҥорбут оҥоһуктарын — лыҥкыныыр чуорааннары, сыл бэлиэтин ыттары, Чуораанчык уол куукулаларын бэркэ интэриэһиргээн көрдүлэр. «Чуораанчык» алфавитыгар бэркэ билэр пандаларын таба көрөн, бэйэлэрин тылларынан саҥара-саҥара чачыгыраччы күлэн, үөрүүлэриттэн ытыстарын таһыннылар. Онтон саха сылгытын быычыкайкаан сөмүйэлэринэн ыйан көрдөрө-көрдөрө «анньаа» диэн букатын да уу сахалыы саҥараллар. Сардаана Седалищева «Чуораанчык» эрэдээксийэтигэр кэлбит биир сүрүн соругунан — «Кытай туһунан мин өйдөбүлүм» уруһуй күрэҕин түмүгүн таһаарыы. Бу күрэххэ «Чуораанчык» сурунаал 115 ааҕааччыта Саха сирин бары муннугуттан кыттынна. — Саамай үөрбүтүм диэн олус элбэх оҕо кыттыбыт. Кытай туһунан өйдөбүллэрин уруһуй нөҥүө оҕолуу олус ыраастык тиэрдибиттэр. Бу күрэҕи ыытарбар өйөөбүт «Чуораанчык» сурунаал эрэдээксийэтигэр, кыттыыны ылбыт оҕолор төрөппүттэригэр, учууталларыгар, иитээччилэригэр барыгытыгар дириҥ махталбын тиэрдэбин, — диэн санаатын үллэстэр. Онтон уруһуй күрэҕин кыайыылаахтарынан кимнээх буоллулар? Бастакы миэстэ Орто Халыма улууһун С.Н. Горохов аатынан Ойуһардаах орто оскуолатын 3-с кылааһын үөрэнээччитэ Соня Сергучева буолла. Иккис миэстэни Томпо улууһун Ф.М. Охлопков аатынан Кириэс Халдьаайы орто оскуолатын 3-с кылааһын үөрэнээччитэ Валерия Винокурова ылла. Үһүс миэстэ хаһаайкатынан Үөһээ Бүлүүтээҕи 9 №-дээх «Туллукчаан» уһуйаан 6 саастаах иитиллээччитэ Алия Семенова буолла. Элбэх оҕону көҕүлээн кытыннарбыт В.П. Ларионов аатынан Майа орто оскуолатын 1 «Г» кылааһын салайааччыта Александра Антоновна Борисова, Сунтаардааҕы 4 №-дээх «Березка» уһуйаан бэлэмнэнии бөлөҕүн иитээччитэ Нюргустана Иосифовна Кытахова, Аллайыаха улууһун Бөрөлөөх орто оскуолатын 3-с кылааһын кэлэктиибэ, П.И. Шадрин аатынан Өктөм орто оскуолатын үөрэнээччитэ Ванесса Ксенофонтова уонна саамай кырачаан кыттааччы, Уус Алдан улууһун Кэптэни нэһилиэгин «Чэчир» уһуйаан 4 саастаах иитиллээччитэ Марик Олесов анал бириистэринэн бэлиэтэннилэр. Кыайыылаахтарга уонна анал бириис хаһаайыннарыгар Сардаана Седалищева тус бэйэтин аатыттан бириистэри, сэртипикээттэри бэлэхтээтэ. Күрэх бары кыттааччыларыгар анал сэртипикээттэр туттарыллыахтара.
Сардаана МАТВЕЕВА.
