Кытай бөдөҥ SINOMEC корпорацията өрөспүүбүлүкэ сиригэр-уотугар альтернатива буолар кыахтаах энергиэтикэ бырайыактарын олоххо киллэрэр туһунан боппуруоһу дьүүллэһэр. Ол туһунан компания вице-президенэ Вильям Цин Чжан Саха сирин ДьКХ уонна энергиэтикэ миниистирин солбуйааччы Николай Дураевы кытта көрсүһүүгэ эттэ.
Көрсүһүү кэмигэр ДьКХ министиэристибэтин бэрэстэбиитэллэрэ региону энергиянан хааччыйыы уратытын, ыраах сытар Арктика улуустарыгар саҥардыллар энергияны көдүүстээхтик туһаныы уопутун тустарынан кэпсээтилэр. Ону таһынан инвестициялыырга табыгастаах бырайыактары ырытар туһунан дуогабардастылар.
Кытай инвестордара чуолаан Саха сиригэр үбү-харчыны угар баҕалаахтарын биллэрбиттэр. Кинилэр РФ-ҕа инвестиционнай бырайыактары олоххо киллэриигэ уопсайа 100 млрд юаны, ол эбэтэр быһа холуйан 15 млрд доллары туттар санаалаахтар.
Саҥардыллар энергиэтикэҕэ сыһыаннаах норуоттар икки ардыларынааҕы IV конференцияҕа Кытай делегацията кыттарыгар этии киллэрдилэр. Бу сайын ыыталлар тэрээһиҥҥэ государственнай былаас уорганын тутаах үлэһиттэрэ, учуонайдар, уо.д.а кыттыахтара. Ити туһунан ДьКХ министиэристибэтин пресс-сулууспата иһитиннэрдэ.
