Бырабыыталыстыба Бэрэссэдээтэлэ Евгений Чекиҥҥэ ыытыллыбыт пленарнай мунньахха хотугу улуустарга таһаҕаһы таһыы, кэккэ хаһаайыстыбаларга от тиийбэтэ, өҥөнү электронной киэбинэн оҥоруу уо.д.а. боппуруостара көрүлүннэ.
Мунньах саҕалыытыгар ситэриилээх былаас нэһилиэнньэҕэ отчуоттарын туһунан иһитиннэрии оҥоһулунна. Күн бүгүҥҥү туругунан, отчуоттуур мунньахтар 32 улууска ыытыллыбыттар. Бу нэдиэлэҕэ Ленскэй, кулун тутар 13 — 17 күннэригэр Аллараа Халыма улуустарыгар буолаллар. Бастакы вице-премьер Алексей Колодезников отчуоттуур мунньахха Булуҥ улууһун олохтоохторо оскуола уонна хочуолунай тутууларын туруорсубуттарын эттэ. Манна биир сүрүн кыһалҕанан Чычаас күөл быһыта ууну аһардара буолбут. Бастакы вице-премьер этэринэн, кыһыҥҥы суолунан тиэрдиллиэхтээх таһаҕас 62 %-а илдьиллибит. Сорох хотугу улуустарга буурҕа түһэн, онто да суох халыҥ хаары чиҥэтэн, суолу астарыыга ыарахаттары үөскэппитин эттэ. Таба ииримтийиитэ көстүбүтүнэн, үс улууска (Анаабырга, Өлөөҥҥө уонна Аллараа Халымаҕа) харантыын биллэриллибит. Доруобуйа харыстабылын миниистирэ Михаил Охлопков ыраах ыстаадалар табаһыттарыгар быһыы биэриитэ уустугун эппитигэр, табаһыттары болдьох иннинэ быыбардатарга көтөр бөртөлүөттэринэн эмчиттэри хайаан да илдьэ барарга сорудахтанна.
Бырабыыталыстыба Бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев сылгы маассабайдык аһылыкка киирбитинэн, 1,5 тыһ. т от эбии наадатын эттэ. Министиэристибэ Магадан уобалаһыттан 700 т оту атыылаһарга дуогабардаспыт, аны Амур уобалаһын уобалаһын кытары кэпсэтии ыытыллар, өрөспүүбүлүкэ иһинэн 13 тыһ. т от тиэйиллиэхтээх. Хотугу улуустарга хортуоппуйу уонна оҕуруот аһын тиэрдии салҕанар, былааннаммыт 359 туоннаттан 154 т тиэрдиллибит, ордуга бу ый устата илдьиллэр. Россия Президенэ 2017 с. ыам ыйын 7 күнүгэр таһаарбыт ыйааҕар олоҕуран, өрөспүүбүлүкэҕэ 2018 сыл бүтүүтэ өҥөнү электронной киэбинэн оҥоруу 70 %-ҥа тиэрдиллиэхтээх. Онон Евгений Чекин бу хайысханан ыытылар үлэ туругун интэриэһиргээтэ.
