С.А.Зверев-Кыыл Уола аатынан «Олоҥхо» дьиэтигэр СӨ култууратын миниистирэ Владимир Тихонов уонна Сунтаар улууһун баһылыга Анатолий Григорьев култуура үлэһиттэрин кытта көрсүстүлэр.
Миниистир Владимир Тихонов ыытар үлэтин сырдатта уонна инники былаанын билиһиннэрдэ. «Дьокуускайга буолуохтаах «Азия оҕолоро» күрэхтэһиигэ Сунтаар улууһуттан култуурунай тэрээһиҥҥэ 100 оҕо кыттара былааннанар. Бу улахан ситиһии, оҕолор талааннарын сыаналааһын», — диэтэ кини.
Сунтаардааҕы култуура управлениетын начаалынньыга Мария Кобельянова улуус уустарын уонна култуура эйгэтин үлэһиттэрин туһунан кэпсээтэ. Этиитин түмүгэр улуус дьаһалтатын кытта бииргэ үлэлииллэрин бэлиэтээтэ.
Баһылык Анатолий Григорьев «Өссө даҕаны Сунтаарбыт улууһа сайда, үүнэ-чэчирии турарын туһугар бииргэ үлэлиэхпит», – диэн баҕа санаатын эттэ уонна буолаары турар Олоҥхо дойдутун ыһыаҕар миниистири ыҥырда.
Бу туһунан СИА-ҕа Сунтаар улууһун баһылыгын көмөлөһөөччүтэ Тимур Иванов кэпсээтэ.
