Кэскил Баишев онус кылаастан саҕалаан, аргыый аҕай ырыа айар буолан барбыта. Кини ырыалара сахалыы тыыннаахтар, өбүгэлэрбитин кытары ситимниир уонна саха ыччатын өйүн-санаатын уһугуннарар аналлаахтар. Кини СИА ыалдьыта.
Ат иҥэһэтигэр олорор киһи хаһан да биир тэҥник айаннаабат. Ханна эрэ бытаарар, ханна эрэ атара сиэллэрэр. Ол тэҥэ, ырыаһыт киһи эмиэ айар-тутар үлэтигэр наар биир хайысханы тутуспат, туох эрэ саҥаны, уратыны, дьону соһутары, кэрэхсэтэри көрдүү сатыыр. Ол да иһин, Кэскил Баишев бастакы альбомугар айбыт ырыаларын этэр тыыннарынан наардаабакка барытын мунньан укпут буоллаҕына, иккис альбомун уруккутуттан туох эрэ уратылаах гынарга үлэлэспитэ.
Альбом уратыта туохханый?
Бу альбом уратытынан ырыаһыт чопчу бэйэтэ эрэ айбыт ырыаларын сүүмэрдээн киллэриитэ буолар. Ол иһин, үгүс ахсааннаах ырыаларыттан 9 эрэ ырыа киирдэ. Хас даҕаны саҥа ырыа альбомҥа киирбэккэ хаалыыта, ырыаһыт инникитин өссө да дискэ таһаарар кыахтааҕын туоһулуур.
Альбомҥа талыллыбыт ырыалар музыкалара уонна ис хоһоонноро бэйэ-бэйэлэрин кытта ситимнээхтэр, дьүөрэлэһэллэр. Холобур, «Кырдьык уота», «Булчут хааннаахпын», «Харысхалым» уо.д.а. ырыаларын хайдах да биир сиргэ олорон эрэ истиэ суох курдуккун. Хайаан да ырыаһыт этэр тылын ылынан, кини тэтимигэр тэҥҥэ ыллаһан барыах санааҥ баһыйар.
Виталий Очиров уонна Умсуура куоластарынан, толорор тэтимнэринэн Кэскил ырыаларыгар сөп түбэһэр буоланнар, ааптар ырыаларын бииргэ толорууну чуо кинилэргэ итэҕэйдэҕэ. Виталий Очиров дэгэрэҥ матыыбынан «Төрүт дорҕоонум», онтон Умсуура сахалыы кылыһахтаах, күүстээх куолаһынан «Ый саспыт кэмигэр» ырыаларын ааптардыын толоруулара сэҥээриини ылалларыгар саарбахтаабаккын.
Кимнээх оҥордулар?
Кэскил Баишев ырыаларын доҕуһуолларын Арктикатааҕы судаарыстыбаннай искусство уонна култуура институтугар бииргэ үөрэммит, музыка суруйар талааннаах доҕоро Герасим Григорьев таҥан оҥордо. Степан Афанасьев, Александр Пономарев, Степан чочуйдулар. Степан Афанасьев уонна «Добун» студияҕа уһулуннулар.
Түгэнинэн туһанан, Култуура колледжын дириэктэрэ Захар Никитиҥҥэ, «Харысхал» клибим уһуллуутугар көмөлөспүт Саха театрын режиссера Руслан Тараховскайга, аранжировщик Герасим Григорьевка уонна Семен Варфоломеевка («Ситим» үҥкүү бөлөҕө) махтанабын.
https://youtu.be/5qthKWuUoy4?t=7m23s
Альбомҥа хара өҥ тоҕо баһыйда?
Дьиҥэр, халлаан күөхтүҥү өҥнөөх ээ, элбэх өҥ баар. Бэйэм дизайнер үөрэхтээхпин. Баҕар, ол иһин дириҥник көрүү баара буолуо…
Ырыаларынан тугу этиэн баҕарда?
Бар дьонум мин дууһабын истэллэригэр уонна ырыаларбын ылыннахтарына, бэйэлэригэр туох эрэ туһалааҕы уонна саҥаны булалларыгар баҕарабын.
Сольнай концеркын хаһан күүтэбитий?
Былырыын бастакы концерпын оҥорбутум. Онно элбэх ыарахаттары көрсүбүтүм, ол оннугар элбэҕи билбитим-көрбүтүм. Онон иккистээн кэнсиэртиир да буоллахпына, ымпыктаан-чымпыктаан бэлэмнэниэхпин, толкуйдуохпун наада.
Ааккар туох кистэлэҥ баарый?
Кэскил диэн бэйэм аатым. Онон псевдоним наадата суох курдук. Михаил Борисов эмиэ Кэскил диэн ааттааҕа хайабытыгар да мэһэйдээбэт этэ. Олус бэркэ алтыһан ааспыппыт. Билигин ардыгар миигин Кэтс диэн ааттыыллар.
https://youtu.be/95Nwdckt5lo
Видео: Стас Ноев устуута.
Клип: https://www.youtube.com/watch?v=95Nwdckt5lo
