Бу сайыны-күһүнү быһа Кэбээйигэ Кальвица эргэ бөһүөлэгин үөһэ саҥа сиргэ көһөрүүгэ улахан үлэ барда. Саҥа дьиэлэри тутуу, суол оҥоруу, эргэ бөһүөлэктэн дьиэлэри көһөрүү, докумуоннары хомуйуу салҕанар. 


Кыстык кэлиитэ Кальвица бөһүөлэги көһөрүү  сүрүн үлэтэ үмүрүйдэр да, билигин да ситэ-оһо илик элбэх. Ол да буоллар сүүрбэччэ сылы быһа иэрэҥ-саараҥ балаһыанньаҕа олорбут олохтоохтор иннилэрэ чуолкайданан, санаалара көтөҕүллэн сылдьар.

Алтынньы 9 күнүгэр саҥа бөһүөлэккэ административнай-култуурунай киин тутуллан, итиитэ холбонон үлэҕэ киирэр үөрүүлээх сиэрэ-туома ыытылынна. Тэрээһиҥҥэ улуус баһылыга И.И. Левин тыл эттэ.

Бу улахан объегы кылгас болдьоххо хаачыстыбалаахтык тутан киллэрбит тутааччыларга ис сүрэхтэн махтал. Саҥа бөһүөлэккэ көһүүгэ улахан үлэ барбыт, манна эбии оҥорон-тупсаран, ситэрэн-хоторон истэххэ, Кальвица  инникитин өссө күүскэ сайдыа, — диэн Иван иванович эҕэрдэ тылын түмүктээтэ.

Итиэннэ административнай-култуурунай киини туппут “Агентство престиж” ХЭУо генеральнай директорын А.Н. Ефимовы улуус дьаһалтатын Бочуотунай грамотатынан, атын үлэһиттэри Махтал суруктарынан наҕараадалаата.

Салгыы биир улахан социальнай  объект үлэҕэ киирбитинэн Кальвица олохтоохтрун улуус баһылыгын 1 солбуйааччы С.С. Павлов эҕэрдэлээтэ.

-Бу объект улуус урукку баһылыга И.Н. Спиридонов, тутуу управлениетын начальнига А.Н. Капитоновасыраларынан үлэҕэ киирдэ. Тутуу матырыйаалын уунан аҕалыыга Кальвица бөһүөлэгэ уустук сиргэ турарынан, бэдэрээтчити булар уустук этэ. Хата бу Сэбээн Күөлтэн төрүттээх бэйэбит уолбут Алексей Николаевич Ефимовсөбүлэнэн, тиэхиньикэ бөҕө аҕалан, таарыччы кэтэх дьиэлэри да тутууга көмөлөстө, суолбутун да оҥордо, — диэн Степан Степанович бэлиэтээтэ.

Бу кэнниттэн “Агентство Престиж” ХЭУо генеральнай дириэктэрэ А.Н. Ефимов, саҥа бөһүөлэккэ саҥа дьиэ үлэ-дьол, үөоүү-көтүү аргыстаах буола турдун диэн эҕэрдэлээн туран, АКК хаһаайкатыгар Е.В. Гуляеваҕа символическай күлүүһү туттарда. Аалай кыһыл лиэнтэни И.И. Левин, С.С. Павлов, Н.В. ВинокуроваА.Г. Сивцева, А.Н. Ефимов кырыйдылар. Дьон-сэргэ  саҥа дьиэлэрин көрдүлэр, бэйэлэрин күүстэринэн эҕэрдэ кэнсиэри туруордулар.

Улахан саҥа объект тутуллан, Кальвица үгүс кыһалҕата быһаарыллыбыт. Манна атын тэрилтэлэри сэргэ саҥа оскуола-саад тутуллуор диэри оскуола иннинээҕи саастаах оҕолор уонна оскуола оҕолоро үөрэниэхтэрэ.

Оҕо саадыгар уонна оскуолаҕа холбоон 30-тан тахса оҕолоохпут, — диир учуутал Надежда Валерьевна Илларионова. – Сорох дьиэлэргэ гаас холбоно илик буолан, билигин ситэ-хото кэлэ иликтэр. Уопсай дьиэ үлэҕэ киирэн, олох оннун-тойун булан бардаҕына бары кэлиэхтэрэ. Иитээччилэр, учууталлар бары бааллар. “ЯТЭК” логистика хампаанньата спонсордаан сабыс саҥа миэбэл кэлэн, таҥыллан турар. Маны аҕалыыга урукку депутаппыт А.А. Ноговицын, кини көмөлөөччүтэ А.Н. Унаров көмөлөрө улахан. Ону таһынан Үөһээ Бүлүү оскуолатын, Сунтаар алын кылаастаах оскуолатын педкэлэктииптэрэ, “Дьулуур” оҕо хамсааһына үп-харчы ыытан көмөлөстүлэр.

Нэһилиэк баһылыга Н.В. Винокурова улахан кыһалҕалара быһаарыллан эрэриттэн үөрбүтүн кистээбэт:

26 дьиэ дьон киирэн олороругар бэлэмнэр, сайын устата элбэх тутуу матырыйаала тиэллэн кэллэ. Онон ситэтэ суох турбут дьиэлэри ситэрдибит. Дьон салгыы хотоннорун, гараастарын тутталлар. Уонча ыал хайыы-үйэ көһөн киирэн олороллор, атын дьиэлэргэ уочаратынан гааһы киллэрэ сылдьаллар. Дьон күн аайы көһөн тахса турар. Маны таһынан сирдэрин, дьиэлэрин докумуонун оҥотторо сылдьаллар, — диир кини.

Быйыл 8 ыал сүөһүлэрин кыстатар хотоннорун үөһэ туппакка хаалан, аллара кыстыыр былааннаахтар. Нэһилиэккэ сүөһү төбөтүн  ахсаанын энчирэппэт туһугар уот ситимин хаалларалларын туруорсаллар. Икки бааһынай хаһаайыстыба сүөһүлэрин Куокуйга дуогабардаһан кыстатыахтара.

Соторутааҕыта уу боппуруоһа быһаарылынна.  “ОДьКХ” ГУТ уу баһар вездеходу биэрбит, ол хочуолунайы уонна олохтоох дьону уунан хааччыйыахтаах. Сүүрбэ сылы быһа эрэйи-муҥу эҥэрдэспит Кальвица бөһүөлэгэ саҥалыы тыын ылан, сайдыы суолугар эрэллээхтик үктэннэ.

Ааптар: Виктор Эверстов, «Дабаан» хаһыат

Ааптар түһэрбит хаартыскалара

0
0
comments powered by HyperComments