Ленскэй олохтооҕо былырыын атырдьах ыйыгар быраҕыллыбыт даача сиригэр үүнэн турар көлөппүнэни хомуйбут. 

edersaas.ru


Ол хомуйан баран, дьиэтигэр кэлэн, интэриниэттэн хасыһан, көлөппүнэттэн гашиш хайдах оҥоһулларын билбит уонна бэйэтигэр анаан оҥостубут.

Сороҕун туттубут, сороҕун (43 г, бөдөҥ кээмэйгэ киирсэр) дьиэтигэр харайан сытыарбыт.

Онтон ол наркотигын кроссовкаҕа кистээн, Мииринэй куоракка аҕалбыт уонна билэр киһитин гарааһыгар уурбут.

Бу дьыл муус устарыгар пакеттаах маллары Мииринэйтэн Ленскэйгэ илдьэригэр билэр киһитин көрдөспүт. Ол маллар быыстарыгар гашиш кистэммит кроссовкалара эмиэ бааллар эбит. Көрдөспүт киһитэ буоллар, тугу илдьэн эрэрин түһээн да баттаппатах.

Ленскэйгэ кэлбитигэр, наркотигы полиция үлэһиттэрэ булан былдьаабыттар.

Суут көлөппүнэни үргээн, наркотик оҥостубут киһини буруйдааҕынан билинэн, 4 сылга көҥүлүн быһары усулуобунайынан ааҕан, 2 сыл тургутар болдьоххо уурбут.

Бириигэбэр сокуоннай күүһүгэр киирэ илик.

Бу туһунан СӨ Борокуратууратын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн

0

0
0
0
comments powered by HyperComments