Сордоҥноохтон төрүттээх Вероника Дягилева чаҕылхай талааннаах опера ырыаһыта тахсан эрэр. Өймкөөн киэн туттар ыччатыттан биирдэстэрэ буолар. Улуус олохтоохторо, чугас дьонун киэн тутталлар, этэҥҥэ сылдьан өссө үрдүк чыпчааллары дабайарыгар баҕараллар. 


Өймөкөөн кыыһа Вероника Дягилева бу соторутааҕыта Екатеринбург куоракка ыытыллыбыт оҕо, ыччат уонна улахан дьон Аан дойдутааҕы бэстибээл-куонкуруһугар 1-кы истиэпэннээх лауреат аатын ылары ситистэ. Вероника “Академический вокал” диэн номинацияҕа профессионаллар икки ардыларыгар кыайыылааҕынан таҕыста.

Эдэр кыыс билигин бу куоракка М.П. Мусоргскай аатынан Урааллааҕы судаарыстыбаннай консерватория магистратуратын бастакы кууруһун устудьуона, быйыл сайын бу үөрэххэ бүддьүөт салаатыгар киирэн, үөрүүтэ сүҥкэн. Дьоҕурдаах кыыс аны икки сылынан үөрэҕин бүтэрдэҕинэ, салгыы аспирантураҕа киирэр санаалаах. Бэйэтэ этэринэн, консерваторияҕа үлэлиир РФ норуодунай артыыската, профессор, опера солистарын кафедратын сэбиэдиссэйэ, Екатеринбург куорат Опера уонна балет тыйаатырын опернай труппатын уус-уран салайааччыта, РФ Култуура министиэристибэтин иһинэн вокальнай ускуустубаҕа методическай Сэбиэт чилиэнэ Светлана Зализнякка анаан үөрэнээри туттарсыбыта. Вероника Дягилева аны бу күннэргэ дойду тэбэр сүрэҕэр Москубаҕа куонкуруска кыттаары айаннаата.

— Бу куонкуруска, кистээбэккэ эттэххэ, преподавателим этиитинэн, Москубаҕа барарбар генеральнай репетиция курдук кыттыбытым, — диэн билинэр Вероника. – Бэйэм концертмейстерим уоппускаҕа сылдьар буолан, консерватория атын исписэлииһин Татьяна Валуеваны кытта сценаҕа тахсыбытым уонна маннык үрдүк наҕараада ылбыппыттан олус үөрдүм. Андрей Билль, Владимир Виноградов, Светлана Зализняк, Наталья Чиркова(бэстибээл-куонкурус дириэктэрэ) курдук Арассыыйа үтүөлээх артыыстарын, РФ Култууратын үтүөлээх үлэһитин илии баттааһыннаах Диплом мин дьылҕабар биир ураты суолталаах наҕарааданан буолар.

Өймөкөөн улууһун Орто-Балаҕан нэһилиэгэр төрөөбүт Вероника кыысчаан ийэтэ Екатерина Тимофеевна култуура, киинэ эйгэтин үлэһитэ буолан, оҕо эрдэҕиттэн муусука алыбыгар ыллардаҕа. Томторго оскуолаҕа үөрэнэ киирэн баран, кини Томтордооҕу оҕо дьоҕурун сайыннарар оскуолаҕа ситиһиилээхтик үөрэммитэ. Кыыс билигин да ырыаҕа, үҥкүүгэ уһуйбут учууталларын истиҥник саныыр, махтанар. Ол саҕана улуус оҕолоро өрөспүүбүлүкэтээҕи “Хотугу сулус” оҕо телерадиоакадемията тэрийэр улуустааҕы, зонатааҕы, өрөспүүбүлүкэтээҕи көрүүлэригэр актыыбынайдык кытталлара. Вероника даҕаны онтон хаалсыбатаҕа, кини бу куонкурус хас даҕаны төгүллээх лаурета, дипломана буолбута.

Тохсус кылаас кэнниттэн Дьокуускайдааҕы музыкальнай колледжка үөрэниэҕиттэн Вероника Дягилевапрофессионал буолар туһугар үгүскэ үөрэннэ, Арктикатааҕы судаарыстыбаннай институту бүтэрбитэ, 2013 с. Дьокуускайга үгүс тургутууну ааһан, Опера уонна балет тыйаатырыгар үлэлии киирбитэ, Арассыыйа куораттарынан, кыраныысса таһыгар үгүс гастролларга сылдьыбыта.

Ааптар: Любовь КРИВОШАПКИНА

0
0
comments powered by HyperComments