Бырабыыталыстыба дьиэтигэр, кулун тутар 28 күнүгэр, бэйэни салайыныы сүбэ мунньаҕа буолан ааста. Мунньах кыттыылаахтара маҥнай Кемеровоҕа былаҕайга былдьаммыт дьону кэриэстээн, чочумча саҥата суох турдулар. Ол кэнниттэн Ил Дархан Егор Борисов уһуйааннарга, оскуолаларга, үөрэх кыһаларыгар, дьон-сэргэ мустар сирдэригэр, атыы-эргиэн кииннэригэр баһаартан сэрэхтээх буолууга төһө бэлэмнээхтэрин бэрэбиэркэлииргэ сорудахтаата.
Мантан салгыы мунньахха мустубут дьоҥҥо саҥа анаммыт салайааччылары: СӨ Бырамыысыланнас уонна геология миниистирин Максим Терещенконы, СӨ Тыа хаһаайыстыбатын уонна ас-үөлгэ бэлиитикэтин миниистирин эбээһинэһин толорооччу Александр Атласовы, СӨ Экономика миниистирин эбээһинэһин толорооччу Денис Белозерову билиһиннэрдэ. Ыччат миниистиринэн үлэлээбит Афанасий Владимиров СӨ Ил Дархан уонна бырабыыталыстыба ис бэлиитикэтин департаменын салайааччытынан анаммытын иһитиннэрдэ.
Сүбэ мунньахха үс боппуруос көрүлүннэ: муниципальнай тэриллиигэ тутууну ыытарга сири сөпкө докумуоннааһын, Арассыыйаҕа биллэриллибит Үтүө дьулуур сыла Сахабыт сиригэр хайдах ыытылларын дьүүллэстилэр. Хаар ууллан, харалдьык тахсыыта ойуур баһаарыттан сэрэхтээх буолуу кэмэ тирээн кэлэригэр төһө бэлэммитин, ыксаллаах быһыы-майгы үөскээтэҕинэ хайдах дьаһанарга туох былаан баарын ырытыһыы буолла.
Ил Дархан дойду бэрэсидьиэнэ В.Путин Федеральнай Мунньахха туһаайыытыгар тохтоото. Арассыыйа аан дойдуга биэс бастыҥ экономикалаах дойдулар ахсааннарыгар киириэхтээҕин эттэ. Ону ситиһэргэ Сахабыт сиригэр үөрэх кыһалара техническэй идэлээх инженердэри бэлэмнээн таһаарарга болҕомтолорун ууруохтара. Өрөспүүбүлүкэҕэ миэбэли оҥорууга, батарыыга күүстээх үлэ барыаҕа.
Бары улуустарга цифровой экономика өтөн киирэн, дьон дьиэлэриттэн тахсыбакка эрэ араас судаарыстыбаннай өҥөнөн туһанар, докумуон толотторор, оҕону уһуйааҥҥа, оскуолаҕа суруттарар кыахтаныахтара. Итини толорорго улуустары түргэн тэтимнээх интэриниэтинэн хааччыйар оптоволоконнай сибээс ситимэ тутулла турар. Мииринэй куораттан тардыллан оптика Сунтаарга, аны күһүн Ньурбаны уҥуордаан Үөһээ Бүлүүгэ, Бүлүүгэ киириэҕэ.
