Хатыыга 60-нарын, 65-тэрин, 70-нарын ааспыт сэттэ элбэх сиэн эбэтэ, эһэтэ, үлэ бэтэрээннэрэ ырыаҕа күөн көрүстүлэр. Хас биирдии ырыаһыты анаммыт наставнига эрчийдэ, туһалаах сүбэни-аманы биэрдэ. Оскуола ырыаҕа учуутала Саина Тимофеева пенсиялаах, повар идэлээх Марфа Яковлеваны уонна «Түөлбэ» КЭК техүлэһитэ, «Утум» түмсүү салайааччыта Мария Васильеваны үрдүк таһымнаахтык бэлэмнээн, «Бастыҥ наставник» аатын ылла.


Хатыыга аҕам саастаахтарга ыытыллыбыт ырыа күрэҕэр Марфа Яковлева сэттэ сыл устата кэлээскэҕэ олорон баран турбута. Кини Гран-при аатын ылла уонна «Утум»-нар туруорбут супер-бириистэрин — духовканы дьонун-сэргэтин уруйун-айхалын быыһыгар тутта. «Түөлбэ» КЭК дириэктэрэ Аида Непряхина урукку чулуу ыанньыксыттары, күрэх саамай кырдьаҕаһыгар, 73 саастаах Герой ийэ Елизавета Васильеваны, Анастасия Петрованы бэлэмнээбитэ лауреат уонна дипломант буоллулар. Мэҥэдьэк эдэр ыччата Герой ийэҕэ үтүө холобурун иһин махталын биллэрдэ.

«Сарыал» детсад музыкальнай салайааччыта Екатерина Иванова бэлэмнээбит пенсиялаах, «Хатыы» СПК-ны ситиһиилэхтик салайа сылдьыбыт, бу күҥҥэ Мэҥэдьэк нэһилиэгин депутаттарын сэбиэтин солбуйааччы бэрэссэдээтэлэ Александр Иванов лауреат буолла. Кини күрэхтэһии кэнниттэн наставнигынаан дуэттаан, мустубут дьоҥҥо соһуччу кэрэ түгэни бэлэхтээтилэр.

Үһүс лауреатынан олохтоох оскуола охраннига Егор Макаров ааттанна. Кини эбиитин, куолаһа кэрэтинэн «Көрөөччүлэр биһирэбиллэрин» ылла. Егор, хаһан да ханна да ыллаабатах киһи, олохтоох мелодистка Александра Иванова тылын ылынан кыттыста. Онон наставнига киниэхэ истиҥник махтанна. «Түөлбэ» КЭК худруга Дмитрий Попов пенсиялаах, ОДьКХ оройуоҥҥа бастыҥ маастарынан биллибит, култуура туйгуна Алексей Иванову бэлэмнээн дипломант гынна. Үгүс сылларга сүрэхтэн сүппэт истиҥ иһирэх ырыалары бэлэхтээбит дьоммут сорохторо сыанаҕа ыллыы саҥа таҕыстылар. Кыттааччылар уонна наставниктар, долгуйбуттара, бэлэмнэммиттэрэ, эппиэтинэстээхтик сыһыаннаспыттара өтө көстөр.

Бүгүн КЭК саалатын ыы-быччары мустубут махталлаах көрөөччүлэр ытыстарын да күөмэйдэрин да харыстаабатылар, хас биирдии кыттааччыны ытыс тыаһынан көрүстүлэр, сыанаттан ыһыынан-хаһыынан атаардылар.

Дьүүллүүр сүбэҕэ эдэр ыччат үлэлээтэ. «Сарыал» детсад психолога Александра Иванова, ити тэрилтэ дворнига Прокопий Данилов, Дьокуускайтан кэлэ сылдьар Нарыйа Гаврильева бэриллибит судургу, ол эрээри сыаналыырга ыарахан үлэлэригэр дьоһуннук сыһыаннаһан, сөптөөх түмүгү таһаардылар.

«60+» бырайыак ааптара, тэрийээччитэ «Утум» түмсүү салайааччылара (Васильева М.К., Иванова З.Г., Саввинова Н.А.) тэрээһиҥҥэ бирииһинэн көмөлөспүт олохтоох дьаһалтаҕа, «Түөлбэ» КЭК-э, орто оскуолаҕа, дьыссаакка, ФАП-ка, эдэр ыччакка махталын этэр.

Ааптар: Мирослава Иванова.

0
0
comments powered by HyperComments