Өрөспүүбүлүкэҕэ промышленность салаата сайдыытыгар инники күөҥҥэ сылдьар Харбалаахтааҕы чоҕу хостуур тэрилтэ кыһыҥҥы сезоҥҥа бэлэмнэнии үлэтин саҕалаата. Бу күннэргэ сир үрүт араҥатын ыраастааһыҥҥа ылыста.
Харбалаахтааҕы чоҕу хостуур тэрилтэ билигин сир үрүт араҥатын ыраастааһыҥҥа түүннэри-күнүстэри икки симиэнэнэн үлэлиир. Тэрилтэ кылаабынай инженерэ Виктор Викторович Кондрашов иһитиннэрбитинэн, былаан быһыытынан кыһыҥҥы ыйдарга бэлэмнэнии үлэтэ саҕаламмыт. Билигин 3,5 гектар кээмэйдээх сир араҥатын ыраастааһын ыытыллар. Манна 8 машинист, биир взрывник, икки ууну хачайдыыр үлэһиттэр сылдьаллар. Сир үрүт араҥата чох саппааһыгар диэри ортотунан 18 м дириҥнээх. Быйыл 210 тыһ. туонна чох хостууру былаанныыбыт диир кылаабынай инженер Виктор Викторович.
«Чохпут урукку курдук бэйэбит улууспут хочуолунайдарыгар, олохтоохторугар уонна Чурапчы, Мэҥэ Халаҥас, Амма улуустарыгар барыаҕа. Сорох улуустарга төһө даҕаны гаас ситимэ тардылыннар, сыллааҕы былаан улаханнык халбаҥнаабакка турар», – диэтэ.
Эбэн эттэххэ, Харбалаахтааҕы чоҕу хостуур тэрилтэҕэ 99 киһи: харбалаахтар уонна чугас эргиннээҕи нэһилиэк эр дьоно үлэлииллэр. Онон аата да этэрин курдук, дьиҥ-чахчы олохтоохтору үлэнэн хааччыйар улууспут биир төһүү тэрилтэтэ буолар. Улууспутугар коронавируһу сэрэтэр үлэҕэ бу тэрилтэ биир бастакынан 23 тыһ. солк. тыынар аппараты атыылаһарга уонна 150 тыһ. солк. уу харчынан көмөтүн ыыппыта.
Источник: https://ulus.media/2020/06/04/harbalaahtaa-y-choh-razre-a-ky-y-y-letiger-belemnener/
