Хаандыгаҕа саҥа үөрэх дьылыгар успуорт сезонун арыйар Саха Өрөспүүбүлүкэтин үөрэҕин үтүөлээх үлэһитэ, Томпо оройуонун бочуоттаах олохтооҕо, ССРС спордун маастара Михаил Дмитриевич Аммосов бирииһигэр көҥүл тустууга күрэхтэһии ыытылынна. Кылаабынай судьуйанан аан дойдутааҕы успуорт маастара Михаил Егорович Протопопов үлэлээтэ.
2002-2008 с. төрүөх кыттааччылар 10 ыйааһыҥҥа күөн көрүстүлэр. Тыҥааһыннаах киирсии кэнниттэн бэйэлэрин ыйааһыннарыгар Цой Алексей (Мэҥэ-Алдан, 25 кг), Абдураков Алмаз (Хаандыга, 30 кг), Максимов Вова (Хаандыга, 30 кг үөһэ), Скударнов Вова (Хаандыга, 30 кг), Орлов Юра (Сайдыы, 35 кг), Чураков Женя (Хаандыга, 45 кг), Иванова Карина (Сайдыы, 55 кг), Синюта Костя (Хаандыга, 55 кг үөһээ), Яковлев Ярослав (Мэҥэ-Алдан, 50 кг), Иванов Дархан (Сайдыы, 60 кг) кыайыы өрөгөйүн биллилэр.
Күрэхтэһии түмүгүнэн, «Саамай эдэр кыттааччы» Колодезников Женяҕа (Мэҥэ-Алдан), “Кыайыыга дьулуурун иһин» Саввин Эрчимҥэ (Сайдыы), «Бастыҥ быраҕыы» Иванова Каринаҕа (Сайдыы), “Кэскиллээх бөҕөс” Скударнов Воваҕа (Хаандыга), «Кырасыабай хапсыһыы” Кислякова Алинаҕа (Сайдыы), «Турнир бастыҥ бөҕөһө» Орлов Юраҕа (Сайдыы) анал ааттар туттарыннылар.
Тэрээһиҥҥэ анал бириистэри Томпо оройуонун баһылыга Я.И. Степанов, үөрэҕирии салалтатын начаалынньыга С.И. Андросова, Алдан судоходнай хампаанньатын генеральнай дириэктэрэ А.В. Скударнов, урбаанньыттар Рамазанов Г.Г., Моторин А.С., Ракин Ю.В. олохтоотулар.
Михаил Дмитриевич Аммосовка төрөппүттэр ааттарыттан анал бириис туттардылар.
Ааптар: Лена СЛЕПЦОВА, «Томпонский вестник» хаһыат, Ulus.Media сайт.
