Хаайыыга сэллик ыарыылаах 15 %-нан аҕыйаата

0
37

Хаайыыга сэллик ыарыылаахтар ахсааннарын аҕыйатар уонна ааспыт сылга өрөспүүбүлүкэ холуонньаларыгар быһыы-майгы хайдаҕын туһунан РФ Накаастабылы толорор федеральнай сулууспатын Саха сиринээҕи управлениетын киэҥ ыҥырыылаах коллегиятыгар ырытыстылар. Манна Россия Накаастабылы толорор федеральнай сулууспатын дириэктэрин солбуйааччы, ис сулууспа генерал-лейтенана Валерий Бояринев, управление салалтата, холуонньалар начальниктара, быраабы араҥаччылааччылар, общественниктар кытыннылар.


Сүрүн дакылааты оҥорбут управление начальнига, ис сулууспа полковнига Владислав Дзюба иһитиннэрбитинэн, 2017 сыл ахсынньы 31 күнүнээҕи туругунан, өрөспүүбүлүкэ пенитенциарнай тэрилтэлэригэр (ол аата хаайыыларга эрэ буолбакка, силиэстийэлир изоляторга эмиэ) барыта 3539 киһи олорбут, оттон холуобунай-толорор инспекцияҕа учуокка 6156 киһи турбут. Бу 6156 киһи — уопсастыбаттан тэйитиллибэккэ, көҥүллэрэ быһыллыбакка эрэ сууттаммыт дьон.

Холуонньалары харабыллыыр карауллар бобуулаах маллары, наркотигы киллэрэ сатааһын 48 чахчытын бохсубуттар, куттал суох буолуутун хааччыйар сулууспалар 54 гражданины туппуттар. Ол түмүгэр, 287 суотабай төлөпүөнү, 162 лиитэрэ испиирдээх утаҕы уонна 233, 95 г наркотигы булан былдьаабыттар. Бу сокуону кэһии иһин 42 киһи административнай, 8 киһи холуобунай эппиэккэ тардыллыбыттар.

Холуобунай-толорор систиэмэҕэ тирэх буолар өрөспүүбүлүкэтээҕи бырагыраама көмөтүнэн, 10 хаайыылаах хочуолунай операторын идэтин ылбыт, өссө 108 киһи быйыл үөрэниэхтээх. 2016-2017 үөрэх дьылыгар профессиональнай училищеларга уопсайа 942 киһи үөрэммит. Билигин 511 хаайыылаах идэҕэ бэлэмнэнии кууруһун бара сылдьар.

Коллегия мунньаҕар этиллибитинэн, сэллик ыарыылаах хаайыылаах 15 %-нан аҕыйаабыт. Бу сэрэтэр үлэ уонна эмтээһин түмүгэр ситиһиллибит.

0
0