Горнай улууһун олохтооҕо Мария Егорова истибэт дьоҥҥо буулдьанан ытыыга Европаҕа чемпионнаабыта. Спортсмены чиэстиир үөрүүлээх сиэр-туом Бэрдьигэстээхтээҕи оҕо спортивнай оскуолатыгар алтынньы 9 күнүгэр буолла.


Атамай олохтооҕо Мария Егорова буулдьанан ытыыга ситиһиитэ киһини сөхтөрөр. Кини РФ успуордун маастара, СӨ хас да төгүллээх кыайыылааҕа, 2016 с. Россия Кубогын хаһаайката, 2018 с. Россия чемпионката уонна бу сыллааҕы Европа чемпионатын кыайыылааҕа!

Дьүктүөнэ үрэх нүөл сирин-уотун өссө биир ыччата үрдүк ситиһиитинэн Атамай Ала ууһун дьоно-сэргэтэ айхаллаатылар. Эҕэрдэ тылы улуус баһылыгын бастакы солбуйааччыта В.В.Спиридонов эттэ. Тэрээһиҥҥэ кэлбит оҕолорго туһаайан, Мария Егорованы холобур оҥостон, успуорка үрдүк ситиһиилэнэллэригэр баҕа санаатын тиэртэ. Улуус баһылыга Н.В.Андреев аатыттан Бочуотунай грамотаны кытта кыһыл көмүс чаһыны туттарда. Успуорка ситиһиилээхтэргэ анаан улуус дьаһалтата ылыммыт балаһыанньатыгар олоҕуран, Мария Егорова Европа кыайыылааҕа буолбутугар 50 тыһ. солк. сэртипикээти тутта.

Мария ийэтэ Инна Жиркова кыыһыгар эҕэрдэ тылыгар, бу ситиһиитинэн тохтообокко, аан дойду, олимпиада чыпчаалларын дабайарыгар алгыс тылын эттэ. Тренердэригэр Григорий Поповка, Александр Сотниковка истиҥ махтал тылларын тиэртэ.

Атамай нэһилиэгин дьонун-сэргэтин аатыттан нэһилиэк баһылыгын солбуйааччы Алла Филипповна Павлова эҕэрдэлээтэ. Нэһилиэк дьаһалтатын аатыттан 50 тыһ. солк. сэртипикээт туттарда. Дьокутааттарын Сэбиэтин бэрэссэдээтэлэ Дарья Михайловна Сидорова биир дойдулаахтара бүтүн Арассыыйаны ааттаппытынан киэн туттан туран, Марияҕа Атамай нэһилиэгин Бочуоттаах олохтооҕо ааты иҥэрэр туһунан иһитиннэрдэ.

Атамай орто скуолатын дириэктэрэ Мотрена Николаевна Ефремова, чемпионка үөрэммит оскуолатын үөрэнээччилэрин, учууталларын аатыттан эҕэрдэлээтэ. Оскуола аатыттан борооску бэлэхтииллэрин туһунан үөрэн-көтөн туран эттэ. Дойдутугар кэлэн маастар-кылаас ыытарыгар баҕарда.

Маны тэҥэ Мария Егорованы биир улахан кыайыытынан биир дойдулаахтара, аймахтара, тренердэрэ истиҥ тылынан эҕэрдэлээтилэр. Кининэн киэн тутталларын эттилэр.

Мария Егорова, буулдьанан ытыыга Европа чемпионката:

— Бастатан туран, бу үөрүүлээх күнү тэрийбит дьоҥҥо истиҥ махталбын тиэрдэбин. Мин Атамай орто оскуолатын бүтэрбитим. 2000 сыллар саҕаланыыларыгар буулдьанан ытыы көрүҥүнэн дьарыктаммытым. Истибэттэр ортолоругар өрөспүүбүлүкэ чемпионатыгар, 50 м сытан эрэ ытыыга, улахан дьарыга да суох буолларбын, бастакы миэстэни ылары ситиспитим. Онтон ылата, күрэхтэһиини көтүппэккэ кыттар буолбутум. Оччолорго, истибэт дьоҥҥо анаан успуорт саалалар, тиирдэр да суох этилэр. Тириэнэрдэр тиийбэттэрэ. Сайын, хортуонунан бэйэбит оҥорбут сыалларбытыгар ытарга дьарыктанарбыт. Кыайыыларбар, ситиһиилэрбэр тириэнэрдэрим Григорий Попов, Александр Сотников төһүү күүс буолбуттара. Кинилэргэ махталым муҥура суох. Бу буолан ааспыт Европа чемпионатыгар 12 дойдуттан барыта 61 кыттааччы күрэхтэспиппититтэн бастаатым. Оҕолорго, ыччат дьоҥҥо успуордунан дьарыктанаргытыгар, хайаан да иннигитигэр сыал-сорук туруорунаргытыгар баҕарыам этэ. Оччоҕуна эһиги санааҕыт дьиҥ олоххо туолар аналланыаҕа. Истиҥ тылларбын улуус баһылыгар Никита Викторовичка, успуорт улуустааҕы управлениетыгар, Атамай нэһилиэгин салалтатыгар, олохтоохторугар, аймахтарбар, чугас дьоммор тиэрдиэм этэ. Эһиги өйөбүлгүтүн, үтүө санааҕытын бүтэйдии сэрэйэбин.

Василий Тимофеев.

Ааптар хаартыскаҕа түһэриитэ, «Үлэ күүһэ» хаһыат, Горнай улууһа

1
0
comments powered by HyperComments