Дьокуускайга Камал аатынан Татаар судаарыстыбаннай тыйаатыра аан бастакытын ыалдьыттаата. Артыыстар икки испэктээктэрин аҕалбыттар: “Пришлый” драманы уонна “Зятья Гэргэри” кэмиэдьийэни. Бу икки күн Саха тыйаатырын саалатыгар толору көрөөччү мустан, аймахтыы норуот искусствотын биһирии көрдүлэр, ытыстарын тыаһын харыстаабатылар.


Иккис күҥҥэ “Гэргэри күтүөттэрэ» диэн испэктээккэ сырыттым. Испэктээк чэпчэки тыыннаах, биир тыынынан көрүллэр. Татаардыы саҥарар буоланнар, хас биирдии көрөөччүгэ тута тылбааһы истэригэр наушник биэрбиттэрэ. Ол эрээри, сорох көрөөччүлэргэ тиийбэккэ, таах олорон, эрэйи көрдүлэр. Саҥаларын өйдөөбөккө олордоххо, төһө да кэмиэдьийэ буолбутун иһин, син биир сүтэрэриҥ үгүс. Испэктээк үгүс көрдөөх-нардаах, сорох түгэннэргэ көрөөччүлэр күлэн быардарын тарбаатылар.

Ону тэҥэ, артыыстар чэпчэкитик, итэҕэтиилээхтик оонньоон, уобарастарын бэркэ арыйдылар. Холобур, кэргэн кэпсэтэ кэлбит Жаграп төһө да киһиргэс, чэпчэки, халбаҥ майгылаах буоллар, ыллаан-үҥкүүлээн, көрү көҕүлүттэн тутан, көрөөччүлэргэ олус сөбүлэттэ. Оннооҕор оонньообуттарын омунугар ыскамыайкалара алдьаммытыгар, ону буолуохтааҕын курдук, көргө кубулутан кэбистэ. Тута тылбаастыы олорор диктор да кэтэмэҕэйдээбэтэ.

Истэн олордоххо, «кэл-бар», «кыыс-уол», «тохтоо», «биир-икки», уо.д.а. тыллара үүт-үкчү эбит. Оннооҕор «эбээ, эбээ!» диэн ыҥыраллара истэргэ интэриэһинэй. Аҥардас мантан да түүрдүү тыллаах омуктар биир силистээхтэрэ, аймахтыылара көстөр.

Испэктээк кылгас ис хоһоонун кэпсээтэххэ, Гэргэри кыыһыгар үс уол кэргэн кэпсэтэ кэлэллэр: симик-муҥкук Микуш, халбаҥ соҕус, бэһиэлэй  Жаграп уонна күүстээх-уохтаах Васька-Бегемот. Оттон аҕата уолаттарга күөн көрсүүнү, күрэстэһиини тэрийэр. Кыыс хайаларын талыай? Ол эрээри түмүгэ соһуччу соҕус буолан соһутар. Биллэн турар, таптал өрөгөйдүүр.

Бу киэһэ Татарстан норуодунай артыыската Дания Нуруллина төрөөбүт күнэ буолан, Андрей Борисов илиититтэн бриллиант бэлэҕи тутан, соһуччу үөрдэ-көттө. Култуура миниистирэ Владимир Тихонов Татаар тыйаатырын дириэктэрэ Ильфир Якуповка “СӨ култууратын туйгуна” ааты, сүрүн режиссер Фарид Бикчантаевка “Саха сирэ-Арассыыйа 385 сыла” үбүлүөйддээх мэтээли туттарда.

Бу гостуруол РФ култуураҕа министиэристибэтин өйөбүлүнэн тэриллибит.

Ыспыраапка:

“Гэргэри күтүөттэрэ” пьеса христианскай итэҕэли ылыммыт, сүрэхтэммит татаардар олохторун-дьаһахтарын көрдөрөр. Ааптар Туфан Миннуллин кинилэр дэриэбинэлэригэр баран, таҥастарын-саптарын, ырыаларын-тойуктарын, үгэстэрин анаан хомуйбут.

Бу испэктээк Татаар тыйаатырыгар хаһыс да сылын ыытыллар эрээри, сырыы ахсын аншлаг буолар. Тыйаатыр бу испэктээгин илдьэ Москваҕа хаста да гостуруоллаабыта.

Ангелина Васильева, “Саха сирэ” хаһыат, edersaas.ru

0
0
comments powered by HyperComments