Соторутааҕыта СӨ Бырабыыталыстыбатын бэрэссэдээтэлэ Галина Данчикова салайааччылаах оробуочай бөлөх тахсан улууска тутулла турар эбийиэктэри көрдө, оттооһун хаамыытын билистэ.
Ол курдук, Суоттуга 75 миэстэлээх детсад, Кэптэнигэ бааһынай хаһаайыстыба салайааччыта Анатолий Бурнашев бэйэтин күүһүнэн тутар 100 миэстэлээх хотонун, 220 миэстэлээх таас оскуола, Дүпсүҥҥэ Духуобунас киинин, улуус киинигэр 240 миэстэлээх детсад тутууларын көрдүлэр уонна график быһыытынан үлэ тэтимэ сөпкө баран иһэрин ыйдылар. Оттооһун туругун туһунан иһитиннэриини улуус дьаһалтатын баһылыгын бастакы солбуйааччы Сергей Бурнашев оҥордо. Сергей Сестикович быйыл айылҕа наар аанньа кубулҕаттарыгар оҕустаран оттооһун сыллааҕы графига ырааҕынан тутуһуллубакка иһэригэр тохтоото.
«Кырдьык, субу-субу түһэр ардахтар оттооһун хаамыытын, хаачыстыбатын улаханнык атахтаатылар. Ону ол диэбэккэ, мантан хаалбыт быһаарыылаах күннэргэ уталыйбат дьаһаллары ылан, ис кыахтары муҥутуурдук туһанан, сыллааҕы сорудахпытын 80 бырыһыан толордорбут ханнык. Онуоха кытыы сирдэри туһаҕа таһаарар сыалтан улуус үрдүнэн эбии 5-6 толору механизациялаах мобильнай биригээни тэрийиэхпит. Оттооһун хампаанньатыгар улууска «оһуобай» балаһыанньаны биллэрэбит, итиэннэ бары нэһилиэктэргэ «көҥүл хотууру» атырдьах ыйын 15 күнүттэн киллэрэбит», — диэтэ дьаһалта солбуйар баһылыга.
Тыа хаһаайыстыбатын минииситрэ Петр Алексеев өрөспүүбүлүкэ үрдүнэн оттооһун олус уустук усулуобуйаҕа баран иһэрин ыйда. Итиэннэ улуус салалтатыттан оттуур ходуһаларын өссө төгүл көрүнэн баран, атыы резервэтигэр 1000 тоннаны эбии көрүнэллэригэр сорудахтаата. Бу сорудаҕы толорууга уматык, онтон да боппуруостарга көмө баар буолуоҕун эрэннэрдэ правительство председателэ Галина Данчикова.
Төһө даҕаны илгэлээх ардахтар бириэмэтигэр түстэллэр, сааскы өттүгэр күһүҥҥүлүү тымныы күннэр тураннар от үүнүүтүн бытаардыбыттара. Онуоха эбии быыстала суох дохсуннук түһэр ардахтар, бэлэмнэммит от хаачыстыбатын биллэрдик мөлтөттүлэр, өрүстэр кытыллара, үрэхтэр ходуһалара ууга былдьананнар оттуур сир иэнэ аччаата, оттоммут оттор ууга барар түбэлтэлэрэ таҕыста. Күн бүгүн ити биричиинэлэринэн улуус үрдүнэн от сыллааҕа былаана баара суоҕа 18 эрэ бырыһыан туолан иһэр. Оттон сорудах быһыытынан улуус хаһаайыстыбалара быйылгы дьылга 31800 тонна оту соҕотуопкалыахтаахтар этэ.
