Бырабыыталыстыба сылын аайы ыытыллар отчуотугар дьон-сэргэ Уһук Илиҥҥэ сири босхо биэрии туһунан ыйыталаста.
«Ситэриилээх былаас аһаҕастык үлэлиир соруктаах, онон кистээн дьаһайыы, салайыы суох », — диэтэ бэрэссэдээтэл Галина Данчикова. Кини баай-дуол, сир сыһыаннаһыыларын министиэристибэтин иһитиннэриилэрэ аһаҕастарын ордук чиҥэтэн эттэ.
Бүгүҥҥү күҥҥэ сокуон барылын тула дьүүллэһии салҕанан барар, өрөспүүбүлүкэ интэриэһин туруулаһыы тохтообот.
«Сокуон бастакы ааҕыыга ырытылларыгар уопсайа быһа холуйан 100 этии киирбитэ. Сүнньүнэн итиниэхэ олоҕурбут уларыйыылары өрөспүүбүлүкэ баһылыга Егор Борисов Ил Түмэҥҥэ киллэрбитэ», — диэн баай-дуол, сир сыһыаннаһыыларын миниистирэ Евгения Григорьева чопчулаата.
Россия президенин дьаһалтатын быраапка управлениетын түмүгэ тахсыбытын кэнниттэн сокуон барылын ким баҕарар билсэр кыахтаныаҕа. Ону таһынан барылы РФ Уопсастыбаннай балаататыгар ырытыахтара.
«Биһиги туох-ханнык иннинэ өрөспүүбүлүкэ дьонун-сэргэтин, судаарыстыба интэриэһин үрдүктүк тутабыт. Нэһилиэнньэ сокуон барылын ырытыыга көхтөөхтүк кыттыаҕа », — диэтэ миниистир.
Биллэрин курдук, бу сокуон барылын араас таһымҥа киэҥник дьүүллэспиттэрэ, ол да үрдүнэн маны политическай хабааннаах боппуруос оҥоро сатааччылар бааллар.
