Быйыл күһүн Амурдааҕы гуманитарнай-педагогическай государственнай университет тэрийиитинэн Уһук Илиҥҥи федеральнай уокурук иһинэн «Мультимедийнай электроннай үөрэх тэриллэрэ» быыстапка-куонкурус бэһис төгүлүн ыытылынна.
Бу куонкуруска элбэх атын үөрэх тэрилтэлэрин кытары М.К. Аммосов аатынан ХИФУ Хотугулуу-Илиҥҥи норуоттар тылларын уонна култуураларын института «Бичик» национальнай кинигэ кыһата оҥорон таһаарбыт Е.М. Поликарпова, Л.Ф. Молукова, С.Г. Олесова ааптардардаах «Төрөөбүт литература. 6 кылаас» электроннай үөрэх кинигэтинэн кытынна.
Үөрэх кинигэтэ куонкурус финалыгар киирбитин туһунан иһитиннэриини тутан баран, ааптардар ахсынньы 15 күнүгэр онлайн-конференцияҕа кыттан, тоҕус киһилээх дьүүллүүр сүбэ иннигэр электроннай үөрэх кинигэтэ ис хоһоонун, методическай, техническэй кыахтарын ситиһиилээхтик көмүскээтилэр.
Ахсынньы 17 күнүгэр тэрийэр хамыыһыйа куонкурус үс түһүмэхтээх тиһиктээх үлэтин түмүгүнэн, «Төрөөбүт литература. 6 кылаас» электроннай үөрэх кинигэтэ I миэстэни уонна «Лучший профессиональный мультимедийный учебник для школы» диэн анал ааты ылбытын туһунан үөрүүлээх сонуну ыытта. Онон, Хотугулуу-Илиҥҥи норуоттар тылларын, култуураларын институтун үлэһиттэрэ, «Бичик» национальнай кинигэ кыһата биир боччумнаах ситиһиилэннибит диэн бэлиэтииллэр.
Манна даҕатан эттэххэ, «Бичик» кинигэ кыһата «Саха тыла» уонна «Төрөөбүт литература» уруоктарыгар туттарга, быйылгы үөрэх дьылын саҕаланыытыгар, 5-тэн 8-с кылааска диэри маннык электроннай үөрэх кинигэлэрин өрөспүүбүлүкэ оскуолаларыгар тарҕаппыта. Үөрэх кинигэтэ Windows, Android, MaсOS операционнай систиэмэлэргэ үлэлиир, стационарнай көмпүүтэргэ (интерактивнай дуоскаҕа холбонуон сөп), ноутбукка, планшетнай көмпүүтэргэ, смартфоҥҥа көстөр. Кинигэ тутула, ис хоһооно, ойуута-бичигэ үөрэх кинигэтин бэчээтинэй көрүҥэр толору сөп түбэһэр. Электроннай үөрэх кинигэтигэр видео, аудио-файллар, тургутук араас көрүҥнэрэ, оонньуулар, худуоһунньуктар хартыыналара, уруһуйдар, оҕолор айар үлэлэрэ, ааҕарга эбии матырыйааллар киирдилэр. Маны таһынан бэйэ бэлиэтэниитэ, эбии үлэни толоруу, наадыйар тылы туруоран көрдөөһүн эбии оҥоһуллаллар.
Салгыы үөрэх кинигэлэрин оҥорууга маннык таһымнаахтык, айымньылаахтык кыттыһан, аныгы информационнай технология кыаҕын барытын табатык туһанан бииргэ үлэлээтэххэ, элбэҕи, дьоһуннааҕы, туһалааҕы оҥоруохха сөп диэн түмүккэ кэлэбит.
