Өрөспүүбүлүкэтээҕи 2 №-дээх балыыһаҕа травматолог, анестезиолог быраастарга маастар-кылаастар ыытылыннылар.
Маастар-кылаастаах көһө сылдьар оскуоланы Екатеринбург к. 36 №-дээх балыыһатын травматологияҕа отделениетын сэбиэдиссэйэ, үрдүк категориялаах травматолог-быраас, м.н.к. Сергей Ушаков ыытта.
Травматология салаатыгар үөрүйэҕи атастаһар соруктаах лекцияларга уонна маастар-кылаастарга өрөспүүбүлүкэтээҕи 2 №-дээх балыыһа травматологтарын, хирурдарын, анестезиологтарын сэргэ Мирнэй, Мэҥэ Хаҥалас улуустарын травматологияҕа кииннэрин уонна улуустааҕы киин балыыһалар травматолог-быраастара кытыннылар.
Сергей Ушаков үлэлиир клиникатын травматологтара үрдүк кылаастаахтарын дакаастаан тураллар. Ол курдук, 1990 с. балаҕан ыйын 14 күнүгэр Кольцово аэропорт таһыгар ЯК-42 самолет сууллуутугар эмсэҕэлээбит дьон бу клиникаҕа эмтэнэн, бары быыһаммыттара. Былырыын балыыһа кэлэктиибэ «Медицинскэй Олимп» үрдүк бириэмийэнэн наҕараадаламмыта. Сергей Александрович эппитинэн, Екатеринбург куоракка таас уҥуоҕун араас эчэйиилэрин (ол иһигэр, «тазовое кольцо) Европа аныгы стандартарынан эмтииллэр.
Онон, эчэйии бу көрүҥэр («тазовое кольцо») үгүс үөрүйэхтээх исписэлиис өрөспүүбүлүкэҕэ кэлиитэ, үөрүйэҕин атастаһыыта Саха сирин хирурдарын үөрэтэргэ, үлэ саҥа ньымаларын туһанарга улахан ситиһиинэн ааҕыллар.
