Бу субуотаҕа, бэс ыйын 10 күнүгэр, Ил Дархан Егор Борисов «Россия-1» ГТРК «Саха» телеханаал нөҥүө быһа эфиргэ тахсан өрөспүүбүлүкэ олохтоохторун ыйытыыларыгар хоруйдары биэриэ. Биэрии 8:20 саҕаланыа.
Ил Дархан уонна бырабыыталыстыба пресс-сулууспата иһитиннэрэринэн, кэпсэтии сүрүннээн уопсастыбаҕа, бэлиитикэҕэ, социальнай эйгэҕэ уонна экономикаҕа сыһыаннаах буолуоҕа. Ордук региоҥҥа бүтэһик кэмҥэ буолбут событиелар тула ыытыллыаҕа.
«Петербурга ыытыллыбыт норуоттар икки ардыларынааҕы экономическай форум түмүктэрэ, чуолаан «Газпром» уонна «РусГидро» ПАУо-лары кытта түһэрсиллибит сөбүлэҥ суруктар тула ырытан кэпсэтии тахсыа. Ил Дархан «Тыа хаһаайыстыбатыгар кадр бэлиитикэтин туһунан» Ыйааҕы сиһилии билиһиннэриэ. Итиэннэ бу саҥа илии баттанаары сылдьар наукаҕа, искусствоҕа, спортка үрдүк ситиһиилэри көрдөрбүт талааннаах оҕолору өйүүр туһунан Ыйааҕы кэпсиэҕэ«, — диэн пресс-сулууспа этэр.
Быһа эфир кэмигэр өрөспүүбүлүкэ олохтоохторуттан ыйытыылары 8(4112) 32-02-02 нүөмэринэн ылаллар.
