Ил Дархан Егор Борисов Ньурба улууһун Дьаархан уонна Күндээдэ нэһилиэктэригэр сырытта. Олохтоохтор нэһилиэккэ бизнес-инкубаторы, шлюз-регуляторы, «Сардаҥа» ХЭУо-ҕа астыыр дьиэни, элбэх функциялаах киини (МФЦ) тутууну, Киирэптээҕи чох разреһын промышленнай кыахха таһаарыыны, үүт туттарыллар сыанатын үрдэтиини, техниканы, сүөһүнү атыылаһыыга кредиттээһини, уот тарибын, сибээс уо.д.а. боппуруостар тула кэпсэттилэр.
Күндээдэҕэ көрсүһүүгэ элбэх киһи кэлбит. Ил Дархан кириисис, «Сири босхо түҥэтии» сокуон барылыгар, «АЛРОСА» АХ олоххо киирбэтэх приватизациятын тула өрөспүүбүлүкэ туох-ханнык үлэни ыытарын кэпсээтэ. Салгыы олохтоохтор саамай истиэхтэрин баҕарар ыйытыктарыгар «Күндээдэ оскуолата тутуллан бүтүөҕэ» диэн эппиэти истэн, ытыстарын таһыннылар.
Күндээдэ уонна Ньурба к. олохтоохторо нэһилиэккэ уот линиятын реконструкциятын, тыа хаһаайыстыбатын бородууксуйатын оҥорон таһаарааччыларыгар охсуулаах уот харчытын, ветеринар өҥөтүн иһин төлөбүр үрдээһинин, үүт сыанатын, уотурба, эбиэс хаачыстыбатын хонтуруоллааһыны, 10% акцияны төннөрүүнү, балыыһа иккис уочаратын тутуутун, тыа сирин специалистарыгар олорор дьиэ тутуутун, чааһынай хаһаайыстыбаларга лизинынан көтөрү, сибиинньэни аҕалыыны, микрокредитованиены сөргүтүүнү, кулууп дьиэтин өрөмүөнүн уо.д.а. боппуруостары көтөхтүлэр. Хас ыйытыы эппиэттэннэ.
Киирбит этиилэринэн боротокуол оҥоһулунна.
«Экономика түһүүтүгэр оҕустарбакка, олохтоох производствоны сайыннарар, дьоммутун-сэргэбитин харыстыыр дьоһун соруктаахпыт. Быһынныбыт-эһиннибит диэбэккэ, эйэ-дэмнээхтик, түмсүүлээхтик үлэлээн-хамсаан олоххут уйгутун оҥостуҥ», — диэн Егор Борисов олохтоохторго санаатын эттэ.
Ил Дархан Марха муостатын тутуутун көрдө, тутааччылары көрсөн үлэ хаамыытын туһунан кэпсэттэ.
