Саха Өрөспүүбүлүкэтин Уопсастыбаннай балаататын үһүс ыҥырыылаах састаабын үлэ саҕаланыытынан уонна маҥнайгы пленарнай мунньаҕынан Ил Дархан Москваттан видеоконференцсибээһинэн эҕэрдэлээтэ.
Уопсастыбаннай балаата дьон интэриэһин өрө тутар, гражданнар, уопсастыбаннай хамсааһын, судаарыстыбаннай уонна муниципальнай былаас уорганнарын бииргэ үлэлээһиннэрин сүрүннүүр тэрилтэ буолар. Егор Борисов саҥа састаап үтүө үгэһи дьоһуннук тутарыгар, өрөспүүбүлүкэ уопсастыбаннаһын түмэргэ, сомоҕолуурга туһаайыллыбыт үлэни салгыырыгар баҕарда. Уопсастыбаннай балаата дьон болҕомтотун ордук тардар боччумнаах боппуруостары дьүүллэһэр былаһаакканан буолуохтааҕын бэлиэтээтэ. Холобур, ааспыт өттүгэр манна өрөспүүбүлүкэ 2030 сылга диэри социальнай-экономическай сайдыытын стратегията көрүллүбүтэ, “Саха өрөспүүбүлүкэтигэр тыа сирин сайдыытын туһунан сокуон” барыла дьүүлэһиллибитэ. “Уһук Илин гектар” туһунан бырайыагар өрөспүүбүлүкэ киллэрэр этиилэрэ ырытыллан, федерация таһымыгар учуоттаммыттара. Итини санатан туран, Ил Дархан саҥа састаапка өрөспүүбүлүкэ үрдүнэн баар уопсастыбаннай хамсааһыны, кэммиэрчэскэйэ суох тэрилтэлэри итиэннэ дьону интэриэстэринэн түмэр түмсүүлэри кытары көхтөөхтүк үлэлииргэ, дебат култууратын олохтуурга сүбэлээтэ. Онуоха сөптөөх усулуобуйа баарын: аппараат үлэтэ күүһүрдүллүбүтүн, куорат киинигэр Уопсастыбаннай киин арыллыбытын эттэ. Оттон бэйэтин өттүттэн гражданнар кыһалҕаларын быһаарыыга, көҕүлээһиннэрин өйүүргэ судаарыстыбаннай уонна муниципальнай былаас уорганнарын кытаанахтык хонтуруоллуоҕун эттэ. Боростуой киһи кыһалҕатын аахайбат буолуу таҥнарыыга тэҥнээх диэтэ.
Пленарнай мунньахха Уопсастыбаннай балаата бэрэссэдээтэлэ уонна кинини солбуйааччылар талылыннылар. Үһүс ыҥырыылаах Уопсастыбаннай балаата бэрэссэдээтэлинэн Алексей Сергучёв биир санаанан талылынна. Уопсастыбаннай балаата барыта 66 чилиэннээх, ол иһигэр улуустар бэрэстэбиитэллэрэ, дьоҥҥо-сэргэҕэ биллэр уопсастыбаннай үлэһиттэр, кэммиэрчэскэйэ суох тэрилтэлэр салайааччылара: Дьокуускайдааҕы уонна Ленскэйдээҕи Роман архиепископ, Үлэ Дьоруойа Варвара Устинова, Ойуунускай аатынан Саха академическай тыйаатырын дириэктэрэ Анатолий Николаев, саллааттар уонна мотуруостар төрөппүттэрин кэмитиэтин бэрэссэдээтэлэ Мария Емельянова, Хотугу төрүт олохтоох омуктар кырдьаҕастарын сэбиэтин салайааччы Августа Марфусалова уо.д.а. бааллар.
