Балаҕан ыйын 9 күнүгэр буолуохтаах быыбары Үөһээ Бүлүү дьоно-сэргэтэ хаһааҥҥытааҕар да ордук күүтэр. Бу чэрчитинэн бэлэмнэнии үлэтэ күүскэ бара турар.
Үөһээ Бүлүүгэ кэлиҥҥи кэмҥэ быыбар өттүгэр дьон өйө-санаата биллэрдик уларыйда, сылын аайы дьон кыттыыта үрдээн иһэр диэн бэлиэтиибит. Бу туһунан олохтоохтор тус санааларын үллэһиннилэр.
Семен Михалев, Үөһээ Бүлүү улууһун баһылыгын 1-кы солбуйааччы:
— Үөһээ Бүлүүм ытык-мааны олохтоохторо, олус эппиэтинэстээх, долгутуулаах ураты кэмнэр үүннүлэр. Ол курдук, өрөспүүбүлүкэбит Ил Дарханыгар, Ил Түмэн дьокутааттарыгар уонна улууспутугар Мунньах сэбиэтин дьокууттарыгар хандьыдаатынан туруммут дьоммутун талар, куоластыыр ураты күн чугаһаата. Этэргэ дылы, инники сайдыыбытын, кэскилбитин түстүүр ураты кэм үүннэ.
Күндү, ытыктабыллаах биир дойдулаахтарым — үөһээ бүлүүлэр өрөйөн-чөрөйөн биэриэҕиҥ! Инникибитин түстүүр түгэнтэн туора туран хаалбакка, балаҕан ыйын 9 күнүгэр буолаары турар норуот быыбарыгар бары тэҥ санаанан салайтаран, биир киһи курдук түмсүүлээхтик, көхтөөхтүк кыттыаҕыҥ диэн ыҥырабын!
Петр Иванов, Тамалакаан нэһилиэгин баһылыга:
— СӨ Ил Дарханыгар, Ил Түмэн дьокутаатыгар, улуус Сүбэтин дьокутаатыгар хандьыдаатынан туруоруммут дьоммутун биир-биир сыымайдаан талан куоластыыр күммүт субу ыга анньан кэллэ.
Хас биирдии гражданин быыбардыыр быраабын толору туһанан хаалыахтаахпыт. Ол курдук, бу күн – биһиги олорор нэһилиэкпит, улууспут, өрөспүүбүлүкэбит, дойдубут кэлэр 5 сыллааҕы кэскилин түстүүр, инники олохпутун быһаарар суолталаах күн.
Ытык-мааны үөһээ бүлүүлэр, биир дойдулаахтарым! Бука бары биир киһи курдук балаҕан ыйын 9 күнүгэр быыбардыыр учаастакка хара сарсыардаттан тустаах хандьыдааттарбытыгар куоласпытын биэриэҕиҥ, дойдубутун тэҥҥэ салайсыаҕыҥ, сайдыы киэҥ аартыгын диэки муоһаны тутуоҕуҥ диэн ыҥырабын!
Антон Аланаев, Уһук Илиҥҥи федеральнай университет 2-с кууруһун устудьуона:
— Быйыл 18 сааспын туолан, буолаары турар быыбарга аан бастакыбын куоластаары сылдьабын. Долгуйбын. Ытык иэһим буоларын толору өйдүүбүн. Онон хайаан да кыттар санаалаахпын. Түгэнинэн туһанан, биир саастыылаахтарбар буолаары турар быыбарга бары тахсан куоластыаҕыҥ, эдэрдэр баарбытын биллэриэҕиҥ диэн ыҥырабын. Барыгытыгар кытаанах доруобуйаны, бары кэрэни, үтүөнү баҕарабын! Быыбар кэнниттэн балаҕан ыйын 18 күнүгэр Дьокуускайтан Владивостокка сөмөлүөтүнэн көтөбүн. Үөрэхпин ахтыбыт курдукпун.
Саамай аҕа саастаах быыбардааччы Дүллүкү нэһилиэгэр олорор. Быйылгы быыбары 100 саастаах Елена Федоровна Евдокимова хаһааҥҥытааҕар да долгуйа күүтэрин кэпсээтэ:
— Мин хас сыл аайы куоласпын биэрэбин, хас биирдии киһи быыбарга булгуччу кыттыахтаах диэн үөрэтэллэрэ. Ол саҕана уот да суоҕа, ханнааҕы элбэх таҥаспыт кэлээхтиэй, сэнэх таҥаспытын кэттибит да, син хоп курдук, маанытык сананан сарсыарда 5-6 чаастан уочараттаан куоластыы барарбыт. Быыбар кэннэ түүн чүмэчи уотугар сырдаттаран оонньоон-көрүлээн, үҥкүүлээн бырааһынньык тэҥэ ааһара. Онтон билигин сылын аайы дьаһалта үлэһиттэрэ дьиэбэр кэлэн быыбардаталлар. Кэскилбитин түстүүр улахан куоластааһын буолаары турар. Барыбытыгар улахан суолталаах дии саныыбын.
Василий Васильев, 71 саастаах, дуобакка маастарга хандьыдаат:
— Эдэр эрдэхпиттэн биир да быыбары көтүтэ иликпин. Ыалдьыбытым кэннэ дьиэбэр кэлэн куоластата сылдьыбыттара. Кэлин дьону көрсөөрү, сэһэргэһээри бэйэм барар буолбутум. Дойду олоҕор мин куолаһым наадалааҕынан ааҕынабын. Дьоҥҥо оннук санаа, сыһыан баар буолуохтаах. Хас биирдии киһи куолаһыттан норуот олоҕо тутулуктаах буоллаҕа ди, онон бука барыгытын быыбарга ыҥырабын.
«Аленушка» оҕо саадын иитээччитэ Ульяна Андреева:
— Сокуоннай сааһын туолбут хас биирдии гражданин быыбарга кыттар эбээһинэһэ. Мин 18 сааспыттан куоластыыбын. Быыбарга кыттыы – улахан эппиэтинэс. Хандьыдааттары, баартыйалары сиһилии үөрэтиллиэхтээх.
Павла Абрахова, устуоруйа учуутала:
— Мин маҥнайгыбын 2008 сыллаахха Дьокуускай куоракка быыбардаабытым. Хас биирдии сокуоннай сааһын туолбут киһи ытык иэһэ. Бэйэбит олохпут инникитин талар буоллахпыт ди. Киһи ээл-дээл буолбакка олохтоохтук сыһыаннаһыахтаах дии саныыбын. Бу буолаары турар быыбарга үөһээ бүлүүлэр көхтөөхтүк кытталлара саарбахтаммат.
Виктория Павлова, Үөдүгэйдээҕи сынньалаҥ киинин дириэктэрэ:
— 18 сааспын туолааппын кытта биир да быыбары көтүппэккэ кыттабын. Хас биирдиибит ытык иэһэ. Тоҕо диэтэр, гражданин быһыытынан санаабын этэр соҕотох быраабым. Саамай умнуллубат быыбарым — Саха сирин бастакы бэрэсидьиэнин талыы этэ. Өрөспүүбүлүкэбит сайдарын туһугар бука бары куоластыы тахсыаҕыҥ! Сайдыыны түстүүр хандьыдааттарга куоласпытын биэриэххэйиҥ! Үөһээ бүлүүлэр быыбарга үрдүк көрдөрүүнү ситиһиэҕиҥ!
Прасковья Тимофеева, улуус ыччатын лиидэрэ:
— Мин сокуоннай сааспын туолуохпуттан куоластыыбын. Бу буолаары турар быыбар умнуллубата буолуо, тоҕо диэтэр Сахабыт сиригэр уонна Үөһээ Бүлүүбүтүгэр улахан суолталаах. Хас биирдии киһи куолаһа мунньуллан инники олохпутун быһаарар, онон көхтөөхтүк кыттарбыт наада. Ил Дарханы талыы интэриэһинэй уонна эппиэтинэстээх.
Үөһээ Бүлүү үүнэр-сайдар ыччата! Буолаары турар быыбарга күргүөмүнэн тахсан, куоластаан, бэйэбит сөбүлүүр хандьыдааттарбытын өйүөҕүҥ. Салгыы үлэлиир кыах биэрэн дойдубут сайдыытын түстэһиэҕиҥ!
Бэлэмнээтилэр Мария Васильева, Валентина Догоюсова, Александр Тарасов.
