Олунньуга Үөһээ Бүлүү улууһугар Долгуновтар диэн эдэр ыалга бастакы оҕолоро төрөөбүтүгэр ыйдааҕы босуобуйа анаммытын үөрүүлээх быһыыга-майгыга туттардылар.
Долгуновтары улуус баһылыгын социальнай боппуруостарга солбуйааччы Люция Тойтонова, социальнай көмүскэл управлениетын салайааччы Лидия Ильина уонна бу тэрилтэ үлэһиттэрэ, ЗАГС управлениетын Үөһээ Бүлүүтээҕи отделын салайааччы Наталья Алексеева эҕэрдэлээтилэр. Кырачаан киһиэхэ доруобуйаны, төрөппүттэрин үөрдэ турарыгар, этэҥҥэ улаатарыгар баҕардылар уонна өйдөбүнньүк бэлэхтэрин туттардылар.
Олеся Альбертовна уонна Александр Вячеславович Долгуновтар бастакы оҕолорун Кристина диэн ааттаабыттар. Эдэр ыалга ый аайы 17 тыһ. солк. кэлэ турара улахан төһүү буоллаҕа.
Санатар буоллахха, бастакы оҕоҕо ыйдааҕы төлөбүрү бу сыл тохсунньу 1 күнүттэн төлүүр буолбуттара. Дьиэ кэргэн уопсай дохуота биир киһиэхэ тиксэринэн тиийинэн олоруу алын кээмэйэ балтарааҕа төгүллэммитигэр тэҥнэһиэхтээх.
2017 сыл 2 кыбаарталыгар тиийинэн олоруу алын кээмэйэ үлэһит киһиэхэ – 17 601 солк. этэ. Балтарааҕа төгүллээтэххэ, 26 401,50 солк. буолар. Онон үс киһилээх дьиэ кэргэн бу сууманы үскэ төгүллүүр.
Бастакы оҕоҕо ыйдааҕы төлөбүр 17 023 солк. тэҥнэһэр.
Сайабылыанньаны Элбэх дьайыылаах кииннэргэ (МФЦ), эбэтэр социальнай көмүскэл управлениеларыгар биэриэххэ сөп.
