Муус устар 6 күнүгэр Нам нэһилиэгин олохтоохторугар, үөрэнэн-үлэлээн ааспыт дьоҥҥо долгутуулаах, күүтүүлээх күнүнэн буолла. Ол курдук, 220 миэстэлээх таас оскуола бастакы 12 м. уһуннаах сваятын түһэрии үөрүүлээх быһыыга-майгыга ааста.
Ыраахтан-чугастан кэлбит ыҥырыылаах ыалдьыттарынан оскуоланы араас сылларга бүтэрбит выпускниктар, өр сылларга үтүө суобастаахтык үлэлээбит кырдьаҕас учууталлар, нэһилиэккэ салайар үлэҕэ сылдьыбыт биллэр-көстөр дьон буоллулар. Нам орто оскуолатыгар директорынан үлэлээн ааспыт кырдьаҕас учуутал, спорт бэтэрээнэ Николай Павлович Корякин-Уран Ньукулай аал уоту арыылаах алаадьынан, уохтаах кымыһынан, үрүҥ сылгы сиэлинэн айах тутан алгыс маанытын анаата.
Улуус баһылыга Владимир Семенович Поскачин: «Оскуола тутуутун саҕалаатыбыт, улахан дьыала буолла. Нам нэһилиэгэ киһитин ахсаана элбэҕинэн даҕаны, урукку өттүгэр улахан И.Барахов аатынан совхоз кииннээн олорбут сирэ-уота буоларынан сибээстээн, Үөһээ Бүлүүгэ биир улахан, тутаах нэһилиэкпит буолар. Бу тутуу боппуруоһа мин баһылык буолуом инниттэн турар. Ааспыт сылтан саҕалаан «АЛРОСА» хампаанньаттан ылар 1 %-наах дивидеммит улууска быһа эбии дохуот быһыытынан киирэр буолла. Экономика министерствотын кытары сөбүлэҥ түһэрсэн, Нам оскуолатын кытары улуус киинигэр культура дьиэтин тутабыт диэн икки объект тутуута саҕаланна».
«227 устуука свая кэлэн сытар. Бу күнтэн саҕалаан үлэ барыаҕа. Ыам ыйыгар сваялар туран бүтүөхтээхтэр. 20-чэ үлэһит бары кэриэтэ төрүт Үөһээ Бүлүү ыччаттара. Намнар бэйэлэрин уоллара Максим Григорьевич Харлампьев буурга кэлэн үлэлээн эрэр. Нам нэһилиэгин баһылыгын Александр Иннокентьевич Кардашевскайы кытары кэпсэтии быһыытынан уонча үлэ миэстэтигэр төрүт олохтоох ыччаты үлэлэтэр былааннаахпыт. Оскуола корпуһун туруорардыы үлэ барыахтаах», — диэн тутуу генеральнай бэдэрээччитэ олохтоох «Макс» МУТ салайааччыта Евгений Данилович Корякин кэпсээтэ.
2017 сылга тутуллан үлэҕэ киириэхтээх оскуола бырайыага саҥа ирдэбилгэ эппиэттиир гына оҥоһуллубут буолан, урукку оскуолалардааҕар иэнэ улахан буолуоҕа диэн тутууга сыһыаннаах специалистар мэктиэлээтилэр. Урукку оскуола миэстэтигэр эбии икки чугас олорбут чааһынай ыалы атын уһаайбаларга көһөрөн туран, киэҥ-куоҥ территориялаах саҥа таас оскуола тутуллан дьэндэйиэҕэ. Историяҕа хаалар бэлиэ түгэни эт харахтарынан көрбүт олохтоохтор, өр күүппүт ыра санаалара туолбут ытык кырдьаҕастар, саҥа оскуолаҕа үөрэниэхтээх оскуола кырачаан үөрэнээччилэрэ свая түһүүтүн «ураа» хаһыылаах, ытыс дохсун тыаһынан уруйдаатылар-айхаллаатылар.
