Ааспыт нэдиэлэҕэ Үөһээ Бүлүүгэ «ЗОЖигай вместе с нами» диэн улуустааҕы фестиваль ыытылынна. Тэрийээччилэр — 2-с №-дээх орто оскуола, улуустааҕы Ыччат отдела, Үөрэх управлениета.
1-кы, 2-с, 3-с, 4-с №-дээх, Кэнтик орто оскуолаларыттан, М.А.Алексеев аатынан лицей-интернаттан барыта 80-ча оҕо кыттыыны ылла. Кыттааччылар 4 көрүҥҥэ: РЭП-кэ, флешмобка, граффитига, брейк-дэнска ким бастыҥын, бэлэмнээҕин быһаардылар.
РЭП толоруутугар бастакы миэстэни Уйгулаан Максимов (3-с №-дээх оск.), иккис миэстэни Стас Егоров (2-с №-дээх оск.), үһүс миэстэни Андрей Негтегяев (лицей-интернат) ыллылар. Флешмобка бастакы миэстэҕэ лицей-интернат, иккискэ Кэнтик, үһүскэ 2-с №-дээх орто оскуола хамаандалара таҕыстылар. Граффити уруһуйдааһыныгар бастакы үс миэстэлэри кыргыттар ыллылар, Зулейха Егорова (2-с №-дээх орто оск.) бастакы миэстэ, Уруйдаана Васильева (2-с №-дээх орто оск.) иккис, Эльза Иванова (Кэнтик) үһүс буоллулар. Брейк-дэнс үҥкүү көрүҥүгэр эмиэ кыргыттар миэстэлэһэннэр, уолаттары ырааҕынан хааллардылар. Бастакы миэстэни Валя Донская, иккиһи Анжелика Фонина, үһүс миэстэни Виталина Петрова ыллылар. Кыргыттар үһүөн 1-кы №-дээх орто оскуола үөрэнээччилэрэ. Кыайыылаахтарга грамоталары, сертификаттары, бириистэри туттардылар.
Ону таһынан, Иван Иванов уонна биир дойдулаахпыт, Иркутскай куоракка үөрэнэр, Дьокуускай куоракка ыытыллыбыт «Якутск Сити-Брейкерс» күрэх кыайыылааҕа Алексей Тихонов маастар-кылаастары көрдөрдүлэр, оҕолору элбэххэ үөрэттилэр. Алексей сотору кэминэн Минск куоракка аан дойдутааҕы чемпионат сүүмэрдиир турнирыгар кытта бараары сылдьар.
