Саха дьонун кутун туппут Дыгын Оонньуулар саҕаланаллара бэрт аҕыйах хонук хаалла. Оонньууларга 12 күөн көрсөөччүлэр ох курдук оҥостон, билигин бэлэм сылдьаллар. Кинилэртэн алта бастыҥнарын тустарынан СИА сырдатар.
Бэс ыйын 25-26 күннэригэр Үс Хатыҥ сиригэр-уотугар албан аатырбыт, суон сураҕырбыт Дыгын Оонньуулара ыраахтан-чугастан дьону-сэргэни түмэ тардыахтара. Оонньуу кыттааччылара: Алексей Кутуков (Нам), Петр Старостин (Чурапчы), Алексей Козлов (Усуйаана), Егор Филиппов (Хаҥалас), Любомир Николаев (Үөһээ Бүлүү), Артем Варданян (Нам), Дьулустаан Ноговицын (Горнай), Николай Маттананов (Таатта), Андрей Тюнгюрядов (Нам), Иван Белолюбскай (Уус-Алдан), Дмитрий Попов (Уус-Алдан), Антон Тойтонов (Нам).
Антон Тойтонов
Дыгын Оонньууларыгар күрэстэһээччилэри талар Намҥа буолбут түһүмэххэ үһүс миэстэлээхтэн алта ахсаанынан хаалан, оонньууга кыттар кыаҕа аччаабыта.
Спортсмен 400 м сүүрүүгэ бастыыр кыахтааҕа эрээри, сүүрэн иһэн охтон түһэн ситиһиини халты харбаабыта. Хаҥалас улууһугар ыытыллыбыт спортсменнары сүүмэрдиир иккис түһүмэххэ кыттан Дыгын Оонньууларыгар кыттар быраабы толору ылбыта. Кини Тумулга Иннокентий Халдеев бирииһигэр ситиһиилээхтик кыттан бэйэтин ыйааһыныгар үһүс бочуоттаах миэстэни ылбыта.
Дмитрий Попов
Мас-рестлиҥҥэ аан дойду чөмпүйүөнэ Хаҥаласка буолбут иккис түһүмэххэ Дыгын Оонньууларыгар кыттар быраабы ылбыта. Манна кини 33 күүстээх утарсааччыларын кэннигэр хаалларбыта. Оҕунан ытыыга кини 60-тан 59 ахсааны ылбыта, сүүрүүгэ төрдүс буолбута, оттон маһы тардыыга тэҥнээҕин булбатаҕа. Бу түһүмэххэ кини тааһы 127,50 м сыҕарытан Антон Тойтонов рекордун охсубута.
Дмитрий Попов бэйэтин көрдөрүүлэрин күн аайы тупсаран иһэр.
Егор Филиппов
Ыстаҥаҕа өрөспүүбүлүкэ аҕыс төгүллээх рекордсмена пауэрлифтинынан утумнаахтык дьарыктаммыта. Кини Сунтаарга буолбут турнирга чөмпүйүөн үрдүк аатын ылбыта. Ыстаҥаҕа уонна сүүрүүгэ кыахтара Дыгын Ооньууларыгар элбэх ахсааны биэриэхтэрин сөп.
Алексей Кутуков
Урукку Оонньуулар кыайыылаахтара Нам улууһун Ыһыаҕар кыттан, үрүҥ көмүс мэтээли ылары ситиспитэ. Алексей Кутуков мас-рестлининэн утумнаахтык дьарыктанар, 2014 сыллаахха кини аан дойду чөмпүйүөнэ буолбута.
“Үс төгүл үс» ыстаҥаҕа Алексей Кутуков 32,05 м. ыстаммыта. Антон Тойтонов 29,89 м ыстанар эбит буоллаҕына, Егор Филиппов — 36,03 м. Былырыыҥҥы оонньууга Кутуков хапсаҕайга уонна сүүрүүгэ бастыҥ этэ.
Иван Белолюбскай
Үс сыллаах тохтобул кэнниттэн сэттэ төгүллээх чөмпүйүөн Белолюбскай Оонньууга кыттарын быйыл ыам ыйыгар эппитэ. Хапсаҕайга, мас-рестлиҥҥэ, ыстаҥаҕа спорт маастара, «Боотур» спорткулуубун салайааччыта. Белолюбскай кэлин мас-рестилининэн үлүһүйэр, многоборьеҕа кыттыбат.
Петр Старостин
Чурапчы чаҕылхай бэрэстэбиитэлэ Аммаҕа буолбут Ыччат Ыһыаҕар төрдүс миэстэни ылбыта. Кини дьону-сэргэни сөхтөрөрү сатыыр. Иван Белолюбскай хас да көрүҥҥэ төннүбүтүн кэннэ Старостин хайдах кыттыаҕын эрдэттэн сэрэйэр уустук.
