Иһэр ууну ыраастааһын балаһыанньата бу күһүнтэн тупсуохтаах. Саҥа ыраастыыр уонна ууну мунньар тутуу 77 быр. бэлэм буолла. Сайын тестовай режиминэн үлэлэтиэхтэрэ.
Үлэ хайдах ыытылла турарын туһунан суруналыыстарга пресс-тур кэмигэр кэпсээтилэр. Эбэ кытылыгар улахан тутуулар дьэндэспиттэр, тэрили таҥыы ыытыллар, ыарахан уйуктаах тиэхиньикэ үлэлиир.
5 млрд солк сыаналаах саҥа водозабору тутуу 2012 с. саҕаламмыта. “Былаан быһыытынан ыам ыйын 25 күнүттэн барытын орун оннун булларар үлэлэр саҕаланыахтара. Тестовай режиминэн бу сайын үлэлиэҕэ. Водозабору дьиҥ таһымнаахтык туттарыы алтынньыга ыытыллыаҕа”, — диэтэ ОДьКХ уонна энергетика миниистирэ Данил Саввинов.
Ууну ыраастыыр тутуулары “Тахал Консалтинг Инжиниирс” Израиль хампаанньата ыытар. Уу кэмчи, туустаах сиригэр тайаан сытар Еврейскай судаарыстыба ууну хайдах ыраастыыры баһылаабыт дойду. Фирма Дьокуускайга баар бэрэстэбиитэлэ Сергей Терещатов Өлүөнэттэн кэлэр уу хас да сүһүөхтээх ыраастааһыны ааһарын кэпсээтэ. Маны сэргэ ууну ыраастыырга хлор оннугар гипохлорит натрия туһаныллыаҕа.
Саҥа үлэлээтэҕинэ, эргэ водоканал саппааска таһаарыллыаҕа.
Аламжи Будаев,
Андрей Сорокин хаартыската.
