Дьокуускайга Арктикатааҕы ГАТУ (урукку ДьТХА) ипподромугар ыам ыйын 30 күнүгэр үгэскэ кубулуйбут өрөспүүбүлүкэтээҕи ат сүүрдүүтэ буолуоҕа. Кыайыы 75 сылыгар, сахалартан Сэбиэскэй Сойуус Дьоруойа үрдүк ааты сүкпүттэргэ ананар, диэн «Спорт Якутии» иһитиннэрэр. Көрөөччүтэ суох ыытыллыаҕа.
Тэрийээччилэр иһитиннэрбиттэринэн, коронавирус пандемиятынан сибээстээн, Дьокуускайга буолар быйылгы ат сүүрдүүтэ көрөөччүтэ суох ытыллыаҕа. «Саха» НКиХ ханаалынан көрдөрүллүөҕэ.
Былаан быһыытынан аттар күрэхтэһиилэрэ ыам ыйын 6 күнүгэр буолуохтааҕа, ити эрээри сыстыганнаах дьаҥынан сибээстээн ылыллыбыт миэрэлэргэ олоҕуран буолар күнэ-дьыла көспүтэ.
Балаһыанньанан, ат сүүрдүүтүн күрэхтэһиитигэр тренердэр, аты сүүрдээччилэр испииһэк быһыытынан эрэ киллэриллэллэр. Мааска, бэрчээки ирдэнэр. Дистанция тутуһуллуохтаах. Турнир туох баар санитарнай нуорма ирдэбилинэн ыытыллар. Өскөтүн көрөөччү быһыытынан трибунаҕа көҥүлэ суох киирбит киһи 5000 солк ыстырааптанар.
Өрөспүүбүлүкэ күүстээх сүүрүк аттара кыттыахтара. Аҕыс дистанция оонньонор: 800, 1200, 1400, 1600, 1800, 2000, 2400 уонна 3200 м.
