Куорат тас көстүүтүгэр стрит-арт иллюстрациялары олоххо киллэрии бырайыага саҕаланна. Уулусса искусствотын саҥа таһымҥа таһаарыы туһунан СИА кэрэспэдьиэнигэр куорат кылаабынай архитектора Ирина Алексеева кэпсээтэ.
«Былаан быһыытынан түөрт дьиэ таһын оҥоруохпут. Икки хайысханы тутуһабыт: саха худуоһунньугун авторскай үлэтин көрдөрүү уонна саха бастыҥ классикатын айымньытыттан стрит-арт иллюстрациятын нөҥүө дьүһүйүү», — диэн кэпсээтэ Ирина Алексеева.
Кини этэринэн, «Дьулуруйар Ньургун Боотур» Олоҥхоттон туһаныыга көҥүлү ылыы ыарахаттары үөскэппит, ол эрэн тустаах үлэ аймахтарын кытта уопсай тылы булбуттар.
Киров аатынан уулусса 21-с нүөмэрдээх дьиэтигэр стрит-арт уруһуйу оҥорууга худуоһунньук Кыыдаана Игнатьева бэйэтин хаачыстыбалаах эскизтарынан талыллыбыт. Манна Дьокуускай куорат уобараһа көрдөрүллэр. Иккис дьиэ ойуутугар Кыыдаана Игнатьева оҥорбут кыыс уруһуйа төрүт быһыытынан туттулунна.
Ойуунускай аатынан уулуссаҕа икки дьиэ көстүүтүнэн эдэр, кэскиллээх худуоһунньук Андрей Степанов дьарыктанар. Кини «граффити» уонна «стрит-арт» хайысхаларынан дьарыктанар. Худуоһунньук «Дьулуруйар Нюргун Боотур» Олоҥхоттон уруһуйдары ойуулуо. Бу уруһуйдар ааптардарынан Элляй Сивцев, Владимир Карамзин уонна Иннокентий Корякин буолаллар.
