Дьокуускай — Аллараа Бэстээх хайысханан салгын олбохтоох суудуналар бэйэлэрин үлэлэрин саҕалаатылар. Сыллата хивустар икки кытылы ситимнээн, быыһык кэмҥэ сылдьаллар.
Быйыл биир киһиэхэ билиэт сыаната 1500 солкуобайга тэҥнэһиэ. Сарсыарда 7:00 чаастан киэһэ 17:00-18:00 чааска диэри дьон төһө сылдьарынан айанныахтара. Айанньыт тоҕуоруһар кэмигэр 300-кэ тиийэ киһини Аллараа Бэстээх уонна Дьокуускай кытылыгар тиксэриэхтэрэ.
«Былырыыҥҥы курдук 20 салгын олбохтоох суудуна сылдьыаҕа. Перевалка кэмигэр биэс аэро баар буолуоҕа», — диэн «Ленаводсервис» тэрилтэ салайааччыта Борис Строев кэпсээтэ.
2006 сылтан саҕалаан «Ленаводсервис» тэрилтэ уопутаах хапытааннара кыдьымах быыһынан, муус суола туруор диэри Өлүөнэ өрүс икки биэрэгин ситимнээн, дьону таһаллар.
