Бүгүҥҥү үөрэх, Билии күнэ бүтүн Арассыыйа үрдүнэн улахан үөрүүлээх, бэлиэ күнүнэн буолар. Тыһыынчанан ахсааннаах оҕо бастакы кылааска үөрэнэ киирдэ. Чурапчы улууһун Хоптоҕо нэһилиэгэр И.Федосеев-Доосо аатынан Дириҥнээҕи орто агро-оскуола бастакы кылааһыгар 19 оҕо үөрэҕи саҕалаата. Кинилэр ортолоругар үс паара игирэ оҕолор бааллар.
Диринҥээҕи агро-оскуола бары өттүнэн киһини улаханнык сөхтөрөр. Сонун хайысхалаах буоларын таһынан, улууска соҕотох үс этээстээх дьиэлээх. Оскуола дириэктэринэн иккис сылын олус таһаарыылаахтык М.С. Игнатьев үлэлии-хамныы сылдьар. Бу үөрэх кыһатын историятыгар бүтүн саха норуота киэҥ туттар бөҕөһө, Олимпийскэй чөмпүйүөн Павел Павлович Пинигин үөрэммитэ ааттанар.
Саҥа үөрэх сылыгар 1 кылаас салайааччытынан СӨ үөрэҕин туйгуна, үрдүкү категориялаах учуутал Александра Ивановна Платонова буолар. “Игирэлэр биир кылааска түбэһэн үөрэниилэрэр сэдэх көстүү, биһиги оскуолаҕа — бастакы. Бары даҕаны олуһун диэн үөрдүбүт, соһуйдубут. Оҕолору ааттыыр буоллахха, Мария уонна Григорий Кузьминнар кыргыттара Ньургустааналаах, Нарыйа биир күн төрөөбүттэр. Саргылаана уонна Николай Родионовтар кыргыттара Сандааралаах Дайаана эмиэ игирэлэр. Светлана уонна Константин Поисеевтар уолаттара Эрчимнээх Арчын эмиэ тэҥҥэ күн сирин көрбүттэр. Бары да талбыт курдук сахалыы ааттардаахтар. Бу оҕолорго уонна соҕотох аҕа Л.Л. Макаров уолугар “Арассыыйа ийэлэрэ” акция бэлэҕин, дьахтар сүбэтин бэрэссэдэтээлэ Л.Г. Кирсанова туттарда”, — диэн дириэктэри научнай-инновационнай үлэҕэ солбуйааччы Саргылаана Васильевна Тарасова кэпсиир.
Кырачаан үөрэнээччилэр үөрэх-билии кыһатыгар үктэммит суоллара аптаах, таайтарыылаах, үрдүк таһаарыылаах буоллун диэн алҕыы хаалабыт.
