Өрүү мөлтөх суолунан биллэр Үөһээ Бүлүү улууһун Далыр нэһилиэгин дьоно-сэргэтэ улуус киинигэр иҥнибэккэ айанныыр буоллулар. Далыр — Трудовой учаастак — Мэйик нэһилиэк хайысханан уопсайа 16 килэмиэтир уһуннаах суол бэрт кылгас кэм иһигэр кичэллээхтик оҥоһулунна.


Бүгүн Далырга тыын суолталаах суол арылынна. Инникитин кыһалҕата суох түүннэри-күнүстэри айан суола өрүү аһаҕас буолуоҕар олохтоохтор эрэллээхтэр. Саҥа суолу үөрүүлээхтик аһыы аалай лиэнтэтин улуус баһылыга Владимир Поскачин, нэһилиэк баһылыга Георгий Иванов уонна суолу оҥорбут «ТОНГО ВВ» хааччахтаммыт эппиэтинэстээх тэрилтэ дириэктэрэ Иннокентий Семенов, улуустааҕы суол-иис пуондатын начаалынньыга Тамара Миронова быстылар.

Далыр нэһилиэгэ улуус кииниттэн 70 килэмиэтир ыраах тайаан сытар өрүс уҥуоргуларга элбэх нэһилиэнньэлээх дэриэбинэлэртэн биирдэстэрэ буолар. Манна аан бастакы тимир көлөнү — ГАЗ-51 бу дэриэбинэҕэ Сергей Софронович Тарасов 1954 сыллаахха аҕалбыта биллэр.

Нэһилиэк баһылыга Георгий Иванов:

— Өрүү суолбутугар эрэй бөҕөнү көрөн, уонча сыллааҕыта диэри сороҕор суукканы суукканан, хоно-хоно айаннаан тиийэр түгэннэрдээх буолааччыбыт. Кыахтаах, эдэр өттө  нэһилиэкпититтэн Мэйиккэ, Дүллүкүгэ диэри сатыы сылдьааччы. Онтон кэлин, суолбутун бэйэбит күүспүтүнэн оҥостон, 7-8 чааһынан улуус киинигэр тиийэр буолбуппут. Ыксаллаах быһыы-майгы үөскээтэҕинэ ыксал диэн биһиэхэ буолара. Аны ардах түстэ да, улахан наадалаах суоппар дьон бөҕөтүн тиэнэн баран хонордуу тэринэн айаҥҥа турунар буолара, — диэн ахтар.

Билигин кыра ардахха суол алдьаныа суоҕа. Наадалаах сирдэргэ суон турбалар түстүлэр, үлэ хаачыстыбалаахтык оҥоһулунна. Сыыдам сырыылаах суоппар балтараа чааһынан Бүлүү Эбэ биэрэгин булар буолла. Өрүү суоллара быстар, айаннара атахтанар дьоҥҥо бу — улахан дьол.

Нэһилиэк баһылыга суол оҥоһуллуутугар быһаччы кыттыылаах дьоҥҥо махтал суругу кытта мүһэ туттарда, кэлбит ыалдьыттары арыылаах алаадьынан айах тутан күндүлээтилэр.

Суол — сайдыы мэктиэтэ диэн мээнэҕэ эппэттэр. Нэһилиэктэн нэһилиэги, учаастактары, улууһу бүтүннүү бииргэ ситимниир суолларынан аны ыччат дьон тыа сиригэр талаһыа дии саныыбын. Онон далырдарга сайдыылаах олоҕу кытта алгыстаах айан кэллэ, — диэн улуус баһылыга Владимир Семенович бэрт дириҥ этиитэ олохтоохтору үөртэ.

Ааптар: Валентина Догоюсова

0
0
comments powered by HyperComments