Өр сыллар усталарыгар улууспут үгүс көлүөнэ үтүө-мааны ыччатын ииппит «Мичил» уһуйаан саҥа дьиэҕэ киирэр сиэрэ-туома ыытылынна. Дьыссаат Чурапчы оройуонугар аан маҥнайгынан аһыллыбыт кырдьаҕас оҕо тэрилтэтэ буолар.
Чурапчытааҕы уһуйаан саҥа дьиэтин Алексей Пинигин салайааччылаах «Прогресс» ХЭТ тэрилтэ үлэһиттэрэ дьэндэтэн таһаардылар. Бу аныгы ирдэбилгэ толору эппиэттиир тупсаҕай тутуу аҕыйах ый иһигэр тутулла охсон, улууспут килбэйэр киинин киэргэттэ. Сып-сырдык, ыраас, киэҥ-куоҥ уһуйааҥҥа 3 саастарыгар диэри 98 кырачаан хабыллан сылдьыаҕа.
Үөрүүлээх дьаһалга СӨ бырабыыталыстыбатын бэрэссэдээтэлин солбуйааччы Ольга Балабкина, СӨ тутууга миниистири солбуйааччы Евгений Афанасьев, СӨ үөрэхтээһини сайыннарарга ресурсанан хааччыйар киин дириэктэрэ Василий Петров, СӨ Ил түмэн дьокутааттара Михаил Гуляев, Семен Никитин, улуус баһылыгын эбээһинэһин толорооччу Алексей Ноговицын, улуус дьокутааттарын Сэбиэтин бэрэссэдээтэлэ Афанасий Захаров, тутуу сүрүн бэдэрээччитэ, «Прогресс» ХЭТ дириэктэрэ Алексей Пинигин уонна улуус тэрилтэлэрин бэрэстэбиитэллэрэ, уопсастыбаннаһа кыттыыны ыллылар.
Алгысчыт аал уоту саламааттаах алаадьынан, уохтаах кымыһынан айах тутан аһатан Үрдүк Айыылартан көрдөспүтүн, алҕаабытын кэнниттэн саҥа дьиэ аһыллыытын туоһулуур аалай лиэнтэни Ольга Валерьевна Балабкина, Алексей Алексеевич Ноговицын, СӨ үөрэхтээһинин үтүөлээх үлэһитэ Мария Чичигинарова, «Мичил» уһуйаан сэбиэдиссэйэ Марианна Яковлева, кырачаан иитиллээччи Мичил Шестаков быстылар.
«Прогресс» ХЭТ дириэктэрэ Алексей Пинигин саҥа дьиэ символическай күлүүһүн уһуйаан сэбиэдиссэйигэр Марианна Яковлеваҕа туттарда. Үөрүүлээх түгэн кыттыылаахтара саҥа уһуйааны киирэн кэрийэн көрдүлэр. Уһуйаан аактабай саалатыгар ыытыллыбыт үөрүүлээх дьаһалга эҕэрдэ тыл эгэлгэтэ этилиннэ. «Прогресс» ХЭТ, «Мичил» уһуйаан үлэһиттэригэр үтүө суобастаах, таһаарыылаах үлэлэрин иһин өрөспүүбүлүкэ, улуус, нэһилиэк бочуотунай грамоталара, махтал суруктара туттарылынна. Оттон тутуу эйгэтигэр уһуннук үлэлээбит «Прогресс» ХЭТ дириэктэрэ Алексей Пинигин уонна тутуу бэтэрээнэ Гаврил Дьячковскай СӨ тутууга салаатын сайыннарыыга киллэрсибит кылааттарын иһин «Саха сирин бочуоттаах тутааччыта» диэн туйгун бэлиэнэн наҕараадаланнылар. Маны таһынан Алексей Семенович Пинигиҥҥэ «Чурапчы нэһилиэгин бочуоттаах олохтооҕо» бэлиэ туттарылынна.
СӨ бырабыыталыстыбатын бэрэссэдээтэлин солбуйааччыта Ольга Балабкина «Мичил» уһуйаан кэлэктиибин, иитиллээччилэри, төрөппүттэри эҕэрдэлээн туран, «Наураша в стране Наурандии» диэн цифровой лабораторияны туттарда.
Улуус биир кырдьаҕас уһуйаана саҥа дьиэҕэ киирэр үөрүүлээх түгэнэ үрдүк таһымнаахтык ыытылынна.
Ааптар: Марфа Петрова, «Саҥа олох» хаһыат, Чурапчы улууһа
